“Xalqaro shartnomani tasdiqlash to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga ko‘ra, Xitoy hukumati, Qirg‘iziston Vazirlar Mahkamasi va O‘zbekiston hukumati o‘rtasida Xitoy—Qirg‘iziston—O‘zbekiston temiryo‘li loyihasini birgalikda amalga oshirishda hamkorlik qilish to‘g‘risidagi bitim tasdiqlandi.
Bitim 2024-yil 6-iyun kuni Pekin shahrida imzolangan.
Transport vazirligi ushbu xalqaro shartnomani amalga oshirish uchun masʼul bo‘lgan vakolatli organ etib belgilandi.
Vazirlar Mahkamasi hamda tegishli vazirlik va idoralarning rahbarlari ushbu xalqaro shartnoma kuchga kirgandan keyin uning qoidalari amalga oshirilishi ustidan belgilangan tartibda nazoratni taʼminlaydi.
O‘zbekiston—Qirg‘iziston—Xitoy temiryo‘li qurilishi loyihasi bo‘yicha uch davlat o‘rtasida hamkorlik to‘g‘risidagi bitim 2022-yil sentyabr oyida Samarqandda imzolangandi. Hujjatda loyihaning texnik-iqtisodiy asoslarini o‘tgan yilning birinchi yarmida tayyorlash ko‘zda tutilgandi.
2023-yil dekabr oyida Xitoydan kelgan mutaxassislar yangi temiryo‘l yo‘nalishida dala ishlarini yakunlagan. 20 yildan ortiq muhokama qilinayotgan loyihaning amalga oshirilishi Xitoydan O‘zbekiston orqali Yevropa va “Janubiy yo‘lak” orqali Fors ko‘rfazi davlatlariga savdo va transport geografiyasini kengaytirish uchun asos bo‘lib xizmat qilishi kutilmoqda.
Izoh (0)