Qirg‘iziston Xitoy—Qirg‘iziston—O‘zbekiston temiryo‘li loyihasining o‘z qismining qurilishini 2024-yilning boshida boshlashi mumkin. Bu haqda Qirg‘iziston bosh vaziri Oqilbek Japarov deputatlar bilan uchrashuvda ma’lum qildi.
Uning ta’kidlashicha, texnik-iqtisodiy asoslarni ishlab chiqish deyarli yakunlangan. Loyiha qiymati 6 milliard dollarga baholangan.
“Biz moliya manbalarini qidirmoqdamiz. Xitoy tomonida qurilish allaqachon boshlangan. Biz O‘zbekiston bilan birgalikda Qozarmondan Jalolobodga qadar moliyalashtirishga deyarli qaror qildik. Bu jarayonni qish-bahorda yakunlasak, kelasi yildan temir yo‘l yotqizishni boshlaymiz”, — dedi Japarov.
Qirg‘iziston bosh vaziri, shuningdek, eksport mamlakatning kelajakdagi iqtisodiy rivojlanishining asosiy omili bo‘lishini ta’kidladi. U Qirg‘izistonni Yevrosiyo savdo markazi va eksport tovarlarini yig‘ish, saqlash, saralash va uchinchi davlatlarga jo‘natish bo‘yicha mintaqaviy logistika markaziga aylantirishga tayyorligini bildirdi.
Izoh (0)