Tashqi ishlar vaziri Xoqon Fidan mintaqaviy hamkorlikni mustahkamlash uchun turkiy davlatlar o‘rtasida yagona alifbo ishlab chiqishga chaqirdi. Bu haqda vazirning bayonotidan iqtibos keltirgan holda Hurriyet Daily News nashri xabar berdi.
Xoqon Fidan 6-iyul kuni Ozarbayjonning Shusha shahrida bo‘lib o‘tgan Turkiy davlatlar tashkiloti sammitida ishtirok etgan. O‘z ishtiroki davomida Anqara rasmiysi qardosh mamlakatlarni o‘zaro hamkorlikni mustahkamlashning yangi jabhalarini topishga chaqirgan.
“Global kuchlar raqobati geografik hududimizga kirib kelishiga yo‘l qo‘ymaslik uchun saflarimizni kuchaytirib, umumiy farovonlik yo‘lida imkoniyatlarimizni ishga solishimiz kerak”, — degan Turkiya tashqi ishlar vaziri o‘z nutqida.
Sammitda turkiy mamlakatlarning bugungi kunda turli alifbolardan foydalanayotgani muhokama qilingan. Bu borada islohot o‘tkazish, lotin alifbosi namunasida yangi alifbo yaratish tavsiya qilingan.
“Biz imkon qadar tezroq alifbo umumiyligiga erishishimiz kerak. Aloqa, energetika, moliya, savdo, mudofaa sanoati va yangi texnologiyalar kabi sohalardagi hamkorligimizni yanada rivojlantirish uchun zaruriy kelishuv asoslarini yaratishimiz kerak”, — deya taʼkidlagan yig‘ilishda Xoqon Fidan.
Turkiy davlatlar vakillari Xoqon Fidanning chaqirig‘ini ijobiy qabul qilishgan. Bu qaror ijobiy amaliy ahamiyatga ega bo‘lishini bildirishgan.
Bugungi kunda turkiy mamlakatlarda turli alifbolar amal qilmoqda. Turkiya, Ozarbayjon va O‘zbekiston lotin alifbosidan foydalanmoqda. Qirg‘iziston va Qozog‘iston esa kirill alifbosini saqlab qolgan.
Izoh (0)