Ташқи ишлар вазири Хоқон Фидан минтақавий ҳамкорликни мустаҳкамлаш учун туркий давлатлар ўртасида ягона алифбо ишлаб чиқишга чақирди. Бу ҳақда вазирнинг баёнотидан иқтибос келтирган ҳолда Hurriyet Daily News нашри хабар берди.
Хоқон Фидан 6 июль куни Озарбайжоннинг Шуша шаҳрида бўлиб ўтган Туркий давлатлар ташкилоти саммитида иштирок этган. Ўз иштироки давомида Анқара расмийси қардош мамлакатларни ўзаро ҳамкорликни мустаҳкамлашнинг янги жабҳаларини топишга чақирган.
“Глобал кучлар рақобати географик ҳудудимизга кириб келишига йўл қўймаслик учун сафларимизни кучайтириб, умумий фаровонлик йўлида имкониятларимизни ишга солишимиз керак”, — деган Туркия ташқи ишлар вазири ўз нутқида.
Саммитда туркий мамлакатларнинг бугунги кунда турли алифболардан фойдаланаётгани муҳокама қилинган. Бу борада ислоҳот ўтказиш, лотин алифбоси намунасида янги алифбо яратиш тавсия қилинган.
“Биз имкон қадар тезроқ алифбо умумийлигига эришишимиз керак. Алоқа, энергетика, молия, савдо, мудофаа саноати ва янги технологиялар каби соҳалардаги ҳамкорлигимизни янада ривожлантириш учун зарурий келишув асосларини яратишимиз керак”, — дея таъкидлаган йиғилишда Хоқон Фидан.
Туркий давлатлар вакиллари Хоқон Фиданнинг чақириғини ижобий қабул қилишган. Бу қарор ижобий амалий аҳамиятга эга бўлишини билдиришган.
Бугунги кунда туркий мамлакатларда турли алифболар амал қилмоқда. Туркия, Озарбайжон ва Ўзбекистон лотин алифбосидан фойдаланмоқда. Қирғизистон ва Қозоғистон эса кирилл алифбосини сақлаб қолган.
Изоҳ (0)