Soliq qo‘mitasi raisi Sherzod Kudbiyev rahbarligida o‘tkazilgan kengaytirilgan Hayʼat majlisida xizmat vazifasini bajarish hamda soliq maʼmurchiligini taʼminlashda jiddiy xato va kamchiliklarga yo‘l qo‘ygan xodimlar faoliyati jiddiy tanqid qilinib, tashkiliy masalalar ko‘rib chiqildi.
Jumladan, berilgan ogohlantirishlar, profilaktik suhbatlar, ko‘rilgan intizomiy choralardan xulosa chiqarmasdan xato va kamchiliklarga yo‘l qo‘ygan hamda belgilangan samaradorlik ko‘rsatkichlari past bo‘lgan Qashqadaryo, Andijon, Farg‘ona viloyatlari soliq boshqarmalari boshliqlari o‘rinbosarlari, Paxtaobod, Izboskan, Sharof Rashidov va Yangi Namangan tumani soliq inspeksiyasi boshliqlari hamda 25 nafar masʼul bilan tuzilgan mehnat shartnomasi bekor qilindi.
Shuningdek, 150 nafarga yaqin xodimga intizomiy choralar belgilandi, 15 nafar xodimning unvoni bir pog‘onaga pasaytirildi.
Yig‘ilishda hududiy soliq organlari va markaziy apparat rahbar hamda masʼulllarning hisobotlari eshitilib, III chorakda soliq tushumlarini kamida 20 foizga oshirish, qo‘shimcha manbalarni jalb etish, soliq to‘lovchilarga ko‘maklashish va sohani raqamlashtirishni izchil davom ettirish yo‘nalishlarida aniq muddatli vazifalar belgilab olindi, — deyiladi xabarda.
Eslatib o‘tamiz, prezident Shavkat Mirziyoyev 2023-yil avgust boshida Andijon va Sirdaryo viloyatlari soliq boshliqlari hamda Soliq qo‘mitasining yirik soliq to‘lovchilar bilan ishlash inspeksiyasi boshlig‘i vazifasi bajaruvchisini lavozimidan olgandi. Ular budjet tushumlarini taʼminlash va tadbirkorlar faoliyatini tekshirishda kamchiliklarga yo‘l qo‘ygan.
Izoh (0)