Ko‘zni dam oldirish uchun qanday damlamalardan foydalanish mumkin? Mutaxassis tushuntirish berdi

Ko‘z kasalliklari bo‘yicha jarroh Jamshiddin Sagdiyev ko‘zni qanday suyuqliklarda yuvib turish foyda berishi haqida “Daryo”ga tushuntirish berdi.

Furatsilin eritmasi, moychechak yoki ko‘k choy damlamasi ko‘zni chayish uning dam olishiga yordam beradi. Biz ba’zi bemorlarga ko‘zga dori tomizishdan oldin ko‘zni damlamalarda yuvishni buyuramiz. Bunda ko‘z “yengillashadi”, undagi ortiqcha moddalar chiqib ketadi va tomchi dorilar yaxshi natija beradi.

Ko‘z chayishni kuniga 6-7 mahalgacha qilish mumkin. Buning hech qanday ko‘zga zarari yo‘q.

Qanday bajariladi?

Masalan, ko‘k choy damlamasi tayyorlanib, shpris yoki paxtaga shimitgan holda ko‘zga quyiladi. Bu amaliyotdan 5-10 daqiqa o‘tib, odatiy ish tartibida davom etish mumkin.  

Foydasi

Birinchi o‘rinda ko‘z ichidagi bakteriyalar, infeksiyalar, tashqi changlar kabi ortiqcha moddalarni chiqarib yuboradi. Shuningdek, ko‘z qurishi sindromini oldini oladi. Ko‘z shamollashini bartaraf etishda ham juda foydali.

Qanday holatlarda mumkin emas?

Bemorning ko‘zida linza bo‘lsa, yuvish mumkin emas. Boisi chayish vaqtida linza chiqib ketishi mumkin. Jarrohlik amaliyotidan keyin, jarohatlar yangi bo‘lgan davrda ko‘zni chayish tavsiya etilmaydi.