“Qandli diabet og‘ir holatlarda ko‘rlikka olib kelishi mumkin” — oftalmolog

Ko‘z kasalliklari bo‘yicha jarroh Sagdiyev Jamshiddin qandli diabetning ko‘zga ta’siri va uning oqibatlari haqida “Daryo”ga tushuntirish berdi.

Shifokorning aytishicha, qandli diabet kasalligi butun organizmda o‘zgarish bilan kechadigan kasallik hisoblanadi.

“Bu kasallik asoratlari ko‘z, buyrak, yurak va butun organizmda qayta tiklab bo‘lmas oqibatlarga olib kelish xavfi bor.

Oftalmologiyada qandli diabetga chalingan bemorlarning ko‘ziga asorat bergan holat aniqlangan kundan boshlab ko‘zni mavjud sog‘lomligini saqlab qolish bemorning yutug‘i hisoblanadi. Og‘ir holatlarda bu ko‘rlikkacha olib kelishi mumkin.

Ming afsuski, bizda ko‘pchilik bemorlar kasallik o‘tib ketganidan keyin ko‘z shifokoriga murojaat qiladi. Oftalmologlar qancha harakat qilmasin ba’zi holatlarda bemorlarga yordam berish qiyin kechadi”, — dedi Jamshiddin Sagdiyev.

Mutaxassisning qo‘shimcha qilishicha, qandli diabet aniqlangan bemorlar har oyda bir marotaba endokrinolog ko‘rigiga borsa, ko‘z shifokoriga har 2-3 oyda bir marotaba ko‘rinib turishi tavsiya etiladi. Qatnov oralig‘i kasallikning yengil yoki og‘irligiga qarab belgilanadi.