Аннексия қилинган Қримнинг Севастопол шаҳрида 23 июнь куни ракета ҳужуми оқибатида тўрт киши ҳалок бўлди, 144 киши жароҳатланди. Бу ҳақда Россия томонидан тайинланган Севастопол маъмурияти раҳбари Михаил Развожаев хабар берди.
Россия ҳаво ҳужумидан мудофаа тизими тўртта ракетани уриб туширган, бешинчиси траекториядан четлашиб, каллак қисми портлаган. Унинг парчалари юзлаб одам дам олаётган пляжга тушган. Россия Мудофаа вазирлиги Украина кассетали каллаклар билан жиҳозланган ATACMS ракеталари билан фуқаролик инфратузилмасини ўққа тутганини даъво қилмоқда. Ракета қолдиқлари пляж зонасига, шу жумладан Учкуевка ва Любимовка районига тушган.
Россия Тергов қўмитасининг Бош тергов бошқармаси 205-модда (террорчилик акти) бўйича жиноий иш қўзғатган. Мудофаа вазирлиги Севастополга ҳужум учун масъулиятни АҚШ ва Украинага юклаб, содир бўлган воқеа жавобсиз қолмаслигини билдирган. Россия томонидан босиб олинган Қримда 24 июнь мотам куни деб эълон қилинди. Путин қурбонларнинг оила аъзоларига ҳамдардлик билдирди.
Изоҳ (0)