Jizzax viloyati G‘allaorol tumanidagi bog‘chada tarbiyachi bolalarni shippak bilan kaltaklagani to‘g‘risida xabar berilgandi. Bolalar ombudsmanining ma’lum qilishicha, holat yuzasidan jinoyat ishi qo‘zg‘atilgan.
G‘allaorol tumanida joylashgan 16-sonli maktabgacha ta’lim muassasasi tarbiyachisi K.M. (ayol) 13-iyun kuni o‘rta guruh tarbiyalanuvchilari xonasiga kelib, go‘yoki sho‘xlik qilgani uchun tarbiyalanuvchilar 6 yoshli T.D., 5 yoshli A.A. va T.K. va 3 yoshli E.E.ni tanasining turli joylariga qo‘li va oyoq kiyimi bilan urgan.
DMTT tarbiyachisi bilan tuzilgan mehnat shartnomasi bekor qilinib, 2024-yil 19-iyun sanasidan e’tiboran egallab turgan lavozimidan ozod etilgan.
Ta’kidlanishicha, 21-iyun kuni K.M.ga nisbatan Jinoyat kodeksining 110-moddasi 2-qismi “a, v” bandlari (qiynash) bilan jinoyat ishi qo‘zg‘atilgan.
Avvalroq Buxoroda farzandini muttasil kaltaklab, qiynab kelgan ayol 3 yilga qamalgani, Samarqandda bog‘chadagi bolalardan biri 3 yoshli qizning qo‘llaridan tishlab, jarohat yetkazgani, Andijondagi bog‘chada tarbiyachi bolaning yuziga bir necha bor tarsaki tushirgani to‘g‘risida xabar berilgandi.
Izoh (0)