Mazkur filmlarni tomosha qilganingizdan so‘ng hayotingizda, albatta, nimadir o‘zgaradi.
“Frida” (2002)
Frida Kalo meksikalik rassom bo‘lib, o‘zining avtoportretlari orqali shuhrat qozongan va ularning hech birida uning tabassumini ko‘rmaysiz.
14 yoshida qiz nufuzli Escuela Nacional Preparatoria maktabiga o‘qishga kiradi — o‘qishga kirgan 35 nafar qizlardan biriga aylanadi, qolgan ikki ming o‘rinni o‘g‘il bolalar egallaydi. Keyin Frida ularning ba‘zilari bilan do‘st bo‘lib, qiziqishlar va ijtimoiy doiralar haqidagi stereotiplarni yo‘q qiladi: ularga qo‘shilib darslarni qoldiradi, futbol o‘ynaydi, siyosat va adabiyot haqida gaplashadi.
Kaloni “yog‘och oyoq” deb masxara qilishadi — bolaligidan poliomielit tufayli oqsoqlanib yurgan. Avvaliga bu qizni qattiq xafa qiladi, ammo 18 yoshida uni taqdirning yanada katta zarbasi kutib turgandi. Frida avtobusda ketayotganida avariyaga uchraydi — avtobusga tramvay kelib uriladi. Metall tutqich to‘g‘ridan to‘g‘ri uning ichidan o‘tib, qovurg‘alarini, bo‘ynini, shuningdek, son suyaklarini sindirib tashlaydi.
Shunga qaramay, rassom eri Diyego Riveraning xiyonatini eng katta fojia deb ataydi.
Taqdirning barcha zarbalariga qaramay, Kalo rasm chizishni to‘xtatmaydi shu yo‘l bilan o‘zi his qilgan hamma narsani boshqalarga yetkazadi.
Biografik filmda bosh rolni Salma Hayek o‘ynagan. Ko‘p yillar davomida u ushbu rolni ijro etishni va filmning hammuallifi bo‘lishni orzu qilgan. Natijada aktrisa “Oskar”, “Oltin globus” va BAFTA mukofotlariga nomzod bo‘ladi.
“Stiven Xoking olami” (2014)
Stiven Xoking — ingliz fizigi, u qora tuynuklar borasida ulkan kashfiyotlar qiladi va Katta portlash nazariyasini qayta ko‘rib chiqadi. Ikki soatlik biografik filmda olim va u bilan birga ilmiy kashfiyotlar qilgan va lateral sklerozga chalingan birinchi rafiqasi Jeyn haqida hikoya qilinadi.
Shifokorlar Stivenning ikki yildan ortiq yashamasligini aytishlariga qaramay, er-xotin taslim bo‘lmaydi va o‘zlariga yoqqan ish bilan shug‘ullanishda davom etadilar. Jeyn Xokingdan farzandli ham bo‘ladi.
Jeyms Marshning filmi Jeyn Xokingning “Cheksizlik sari sayohat: Stiven bilan hayotim” memuariga asoslangan bo‘lib, kartina “Oskar”, “Oltin globus”, BAFTA va “Saturn” kabi bir qancha yirik mukofotlarga sazovor bo‘lgan. Xoking obrazini ingliz aktyori Eddi Redmeyn, Jeynni esa Felisiti Jons ijro etgan.
“Chaplin” (1992)
Komediyachining hayoti qiyin kechgan: otasi oilani erta tark etadi, shuning uchun onasi bolalarni yolg‘iz katta qilishi kerak edi. Aytgancha, aktyor hatto ko‘chaga chiqish uchun onasining bitta-yu bitta tuflisini kiyishga majbur bo‘lgan.
14 yoshiga qadar o‘qishni yaxshi bilmas, pul topish uchun akasi bilan birga gazeta sotgan, xizmatkorlik qilgan, o‘tin chopgan, shisha puflovchi kasbini sinab ko‘rgan. Shunga qaramay, u ota-onasidan aktyorlik iste‘dodini meros qilib oladi.
15 yoshida bo‘lajak yulduz teatrga ishga kiradi va “Sherlok Xolms” spektaklida Billi rolini o‘ynaydi. Aktyorning o‘zi aytganidek, u uchun eng qiyini, rol o‘ynashdan ko‘ra nimanidir o‘qish edi. U birinchi rolini matnni yod olishga yordam bergan akasi yordamida ijro etgan.
Charli ismli kambag‘al yigit qanday qilib muvaffaqiyatli aktyorga aylangani haqida bilib olishingiz va xuddi shu nomdagi film yordamida uning hikoyasidan ilhom olishingiz mumkin. Aytgancha, kichik Robert Dauni “Eng yaxshi aktyor” nominatsiyasida “Oskar” va “Oltin globus” mukofotlariga nomzod bo‘lgan. Ammo Charlining onasi rolini Chaplinning qizi Jeraldin o‘ynagan.
“Aykan: Charchoq bilmas milliarder” (2022)
Karl Aykan — 88 yoshli amerikalik biznesmen, Forbes jurnali bo‘yicha eng muvaffaqiyatli moliyachilar ro‘yxatiga kiritilgan (uning boyligi 20 milliard dollarga baholangan). Uni “Uoll-stritning yolg‘iz bo‘risi” ham deb atashadi.
80-yillardagi faoliyatining boshida Karl arzimas obligatsiyalarni sotgan va biografik film Aykan karyerasining boshlanishi haqida hikoya qiladi. U boshqalarning fikriga umuman ahamiyat bermaydi va bu tavakkalchilik ortida bir necha yillik tajriba turadi.
Katta pulga chanqoq Karl o‘z misolida odam hamma joyda muvaffaqiyatga erishishi mumkin, lekin asosiysi har doim raqamlarga tayanmaslik kerakligini ko‘rsatadi. Buning uchun tavakkal qilish, sezgiga ishonish va raqiblar tajribasini hisobga olish kerak.
“Jobs: rivojlanish imperiyasi” (2013)
“Agar ertaga menga yaxshi nom taklif qilmasangiz, qasamyod qilamanki, men kompaniyaga Apple deb nom beraman”, — deydi bir kuni Apple asoschilaridan biri Stiv Jobs hamkasblariga. Stiv Voznyak bilan birgalikda u o‘z kompaniyasidan butun bir imperiya quradi, ammo bu Jobs uchun oson bo‘lmaydi.
Talabalik chog‘ida hippiga aylangan va universitetdan haydalgach, do‘stlarining yotoqxonasida yotib, oziq-ovqat olish uchun konserva yig‘ishga to‘g‘ri kelgan. U giyohvand moddalarni iste’mol qiluvchi xudbin va janjalkash yigit bo‘lgan. Oliy ma‘lumotning yo‘qligi esa vaziyatni yanada yomonlashtiradi. Biroq u mas‘uliyatli korporativ direktorga aylana oldi.
Kompyuter dahosi o‘z misolida odamlar cheksiz miqdordagi imkoniyat va iste’dodga ega, ammo ularni qanday boshqarishni hamma ham bilmasligini ko‘rsatdi.
Filmda Jobs rolini Eshton Katcher ijro etgan.
“Pushtirang hayot” (2007)
Film afsonaviy Hymne à l’amour, Non, je ne regrette rien, La Vie en rose, Tu es partout va boshqa qo‘shiqlar ijrochisi fransuz xonandasi Edit Piaf (haqiqiy ismi Edit Gassion) hayoti haqida.
Buyuk san’atkor qashshoqlikda ulg‘aygan va yoshligidan sirkda, shahar ko‘chalarida chiqish qilgan... Bu vaqtda uning tengdoshlari qo‘g‘irchoq o‘ynab, zavqlanishardi. Bir kuni kichkina Editning chiqishlarini kabare egasi Lui Leple payqab qoladi va unga Chumchuq deb laqab qo‘yadi (fransuz tilida bu “piaf” bo‘ladi, keyinchalik yulduzning taxallusiga aylanadi).
Ammo dahshatli voqealar ketma-ketligi to‘xtamaydi: Lui o‘ldiriladi, natijada Edit kabareni tark etishga majbur bo‘ladi. Shon-shuhrat qozongan paytida esa Piaf alkogol va giyohvandlikka ruju qo‘yadi, u bir nechta baxtsiz hodisalarga uchraydi va sevgilisining o‘limini boshdan kechiradi.
Edit har kuni sevish, qo‘shiq aytish va yashash huquqi uchun kurashishi kerak edi. Iste’dod fransuz ayolini tubdan ko‘taradi, ammo shunga qaramay u juda erta — 47 yoshida jigar yetishmovchiligi tufayli anevrizma yorilishidan vafot etadi. (og‘ir gastrol safari, shuningdek, noqonuniy moddalar va spirtli ichimliklarni suiiste‘mol qilish uning sog‘lig‘iga qattiq ta‘sir qiladi).
Rejissyor Olivye Daan filmda avval kichkina Editni, keyin esa to‘satdan o‘n yoshga kirgan qizni tasvirlaydi.
Edit rolini ijro etgan aktrisa Marion Kotilyyar roli uchun qoshlarini oldirib, qalam bilan chizgan, shuningdek, uzun sochlarini ham kestirgan. Marion mazkur roli uchun “Oskar”ga sazovor bo‘lgan.
Izoh (0)