Qozog‘istonda turmush o‘rtog‘i Saltanat Nukenovaning o‘limida aybdor deb topilgan sobiq iqtisodiyot vaziri Kuandik Bishimbayev 24 yilga ozodlikdan mahrum etilgandi. U mazkur hukmni o‘zgartirishni so‘rab, shikoyat arizasi yozdi. Bu haqda Tengrinews xabar berdi.
Ostona sudiga mahkumlar va ularning himoyachilaridan hukm ustidan shikoyat arizalari kelib tushgan.
Ular o‘z murojaatlarida Bayjanovning (jinoyatni yashirishda ayblanib, 4 yilga qamalgan Bishimbayevning amakivachchasi) harakatlarida jinoyat ishi yo‘qligi sababli uni oqlashni so‘rashgan. Jinoyat kodeksining 99-moddasi 2-qismi 5-bandida nazarda tutilgan ayblov bo‘yicha Bishimbayevning qilmishlarini Jinoyat kodeksining 106-moddasi 3-qismi bilan qayta tasniflagan holda hukmni o‘zgartirish va jazoni yangi kvalifikatsiyalarga muvofiq qisqartirish, shuningdek, hukmni bekor qilish va ishni yangidan ko‘rib chiqishga yuborish so‘ralgan.
Jinoyat kodeksining 106-moddasi 3-qismi “O‘limga sabab bo‘lgan badanga qasddan og‘ir shikast yetkazish” — 8 yildan 12 yilgacha ozodlikdan mahrum qilish bilan jazolanadi.
Bishimbayev va Bayjanovga nisbatan jinoyat ishi Ostona apellyatsiya sudiga 2024-yil 10-iyun kuni kelib tushgan. Sud qaroriga ko‘ra, ish 26-iyun kuni ko‘rib chiqiladi.
Sobiq vazirning qarindoshi Baxitjan Bayjanov Bishimbayevning xotinini ko‘kargan holda bir necha bor ko‘rgan. Bayjanov jinoyatni yashirish va jinoyat haqida xabar bermaslikda ayblangan. Uning ko‘rsatmasi bilan Bishimbayev xotinini urgani aks etgan kuzatuv kameralaridagi yozuvlarning bir qismi o‘chirilgandi.
Saltanat Nukenovaning o‘limi
2023-yilning 9-noyabr kuni Ostonadagi restoranlardan birida Qozog‘iston sobiq iqtisodiyot vaziri Kuandik Bishimbayevning turmush o‘rtog‘i Saltanat Nukenova tan jarohatlari yetkazilgani oqibatida vafot etdi. Hodisadan bir kun avval kechqurun Bishimbayev “Bau” restoranida rafiqasi bilan janjallashib qolgan. Erkak ilk bor Saltanat Nukenovani hojatxonada, keyin esa liftdan chiqishda urgan. Shundan so‘ng, sobiq vazirning so‘zlariga ko‘ra, turmush o‘rtog‘i restoranning VIP kabinasida divanga yotib uxlab qolgan.
U 9-noyabr kuni kechqurun Nukenovaning yuzi va tanasi sovuq ekanini payqagach, tez yordam chaqirgan. Shifokorlar ayolning bir kun avval o‘lganini aniqlagan.
Izoh (0)