Қозоғистонда турмуш ўртоғи Салтанат Нукенованинг ўлимида айбдор деб топилган собиқ иқтисодиёт вазири Куандик Бишимбаев 24 йилга озодликдан маҳрум этилганди. У мазкур ҳукмни ўзгартиришни сўраб, шикоят аризаси ёзди. Бу ҳақда Tengrinews хабар берди.
Остона судига маҳкумлар ва уларнинг ҳимоячиларидан ҳукм устидан шикоят аризалари келиб тушган.
Улар ўз мурожаатларида Байжановнинг (жиноятни яширишда айбланиб, 4 йилга қамалган Бишимбаевнинг амакиваччаси) ҳаракатларида жиноят иши йўқлиги сабабли уни оқлашни сўрашган. Жиноят кодексининг 99-моддаси 2-қисми 5-бандида назарда тутилган айблов бўйича Бишимбаевнинг қилмишларини Жиноят кодексининг 106-моддаси 3-қисми билан қайта таснифлаган ҳолда ҳукмни ўзгартириш ва жазони янги квалификацияларга мувофиқ қисқартириш, шунингдек, ҳукмни бекор қилиш ва ишни янгидан кўриб чиқишга юбориш сўралган.
Жиноят кодексининг 106-моддаси 3-қисми “Ўлимга сабаб бўлган баданга қасддан оғир шикаст етказиш” — 8 йилдан 12 йилгача озодликдан маҳрум қилиш билан жазоланади.
Бишимбаев ва Байжановга нисбатан жиноят иши Остона апелляция судига 2024 йил 10 июнь куни келиб тушган. Суд қарорига кўра, иш 26 июнь куни кўриб чиқилади.
Собиқ вазирнинг қариндоши Бахитжан Байжанов Бишимбаевнинг хотинини кўкарган ҳолда бир неча бор кўрган. Байжанов жиноятни яшириш ва жиноят ҳақида хабар бермасликда айбланган. Унинг кўрсатмаси билан Бишимбаев хотинини ургани акс этган кузатув камераларидаги ёзувларнинг бир қисми ўчирилганди.
Салтанат Нукенованинг ўлими
2023 йилнинг 9 ноябрь куни Остонадаги ресторанлардан бирида Қозоғистон собиқ иқтисодиёт вазири Куандик Бишимбаевнинг турмуш ўртоғи Салтанат Нукенова тан жароҳатлари етказилгани оқибатида вафот этди. Ҳодисадан бир кун аввал кечқурун Бишимбаев “Бау” ресторанида рафиқаси билан жанжаллашиб қолган. Эркак илк бор Салтанат Нукеновани ҳожатхонада, кейин эса лифтдан чиқишда урган. Шундан сўнг, собиқ вазирнинг сўзларига кўра, турмуш ўртоғи рестораннинг VIP кабинасида диванга ётиб ухлаб қолган.
У 9 ноябрь куни кечқурун Нукенованинг юзи ва танаси совуқ эканини пайқагач, тез ёрдам чақирган. Шифокорлар аёлнинг бир кун аввал ўлганини аниқлаган.
Изоҳ (0)