Jizzax viloyati Favqulodda vaziyatlar bosharmasi Jizzax shahrida joylashgan istirohat bog‘idagi attraksiondan tushib ketgan yigit yuzasidan ma’lumot berdi.
Qayd etilishicha, mazkur holat yuzasidan Jizzax viloyati FVB va profilaktika inspektorlari tomonidan o‘rganishlar olib borilgan. Natijada ushbu voqea 1-iyun kuni soat 20:00 larda sodir bo‘lgani aniqlangan. Paxtakor tumanida yashovchi 17 yoshli M.O‘ oila aʼzolari bilan birgalikda Jizzax shahrida joylashgan “O‘rda ekologik istirohat bog‘i”ga aylanish uchun borib, atraksionda uchish vaqtida operatorlarning ogohlantirishlariga qaramasdan, o‘zining ehtiyotsizligi oqibatida, yaʼni attraksion to‘liq to‘xtamasdan oldin himoya kamarini yechib yuborgan.
Natijada u yiqilib tushgan, biroq hech qanday tan jarohati olmagani va mazkur holat sodir bo‘lgan vaqtda attraksionda nosozliklar bo‘lmagani maʼlum bo‘lgan.
Avvalroq Telegram’da “O‘zbekistondagi eng dahshatli attraksion” deb nomlangan video tarqalgandi. Mazkur videolavhada aks etgan charxpalak attraksioni qo‘mitaning mas’ul xodimlari tomonidan dastlabki o‘rganishlarga ko‘ra, Andijon shahri Bobur nomli istirohat bog‘ida joylashgani aniqlangan edi.
“Daryo”ning 2023-yil mavsumi boshidagi o‘rganishlariga ko‘ra, O‘zbekistondagi mavjud 143 ta istirohat bog‘ida joylashgan 1845 ta attraksionning atigi 5-6 foizi texnik ko‘rikdan o‘tkazilgan bo‘lib, foydalanish uchun xavfsiz degan xulosa berilgan. Qolgan attraksionlarning texnik holati noma’lum. Joriy mavsumda bu holat qanday ekani hozircha noma’lum.
Izoh (0)