Bolalar onkologiyasi va gematologiyasi bo‘yicha I xalqaro kongressi: asosiy maqsad kasallikni erta aniqlash va davolash darajasini oshirish

Toshkent shahrida bo‘lib o‘tayotgan “Dalillarga asoslangan harakat” mavzusidagi bolalar onkologiyasi va gematologiyasi bo‘yicha I xalqaro kongressida ishtirok etayotgan mutaxassislar mavzu yuzasidan o‘z mulohazalarini bildirib o‘tdi.

KANKA bolalar gematologiyasi va onkologiyasi va suyak iligi transplantatsiyasi markazi rahbari, Erdjiyes universiteti tibbiyot fakulteti professori Musa Karakukju bolalarning suyak ko‘migi o‘zak hujayralari transplantatsiyasi bo‘yicha hamkorlikda ishlashga tayyorligini bildirdi.

Hozirda Turkiya sog‘liqni saqlash tizimida bolalarning suyak ko‘migi o‘zak hujayralari transplantatsiyasi juda yaxshi rivojlangan. Yevropa bo‘yicha kuchli uchtalikka kiramiz: Germaniya, Italiya va Turkiya.

Toshkentda juda yaxshi Bolalar gematologiyasi, onkologiyasi va klinik immunologiyasi markazi bor. O‘zbekistonda bolalarning suyak ko‘migi o‘zak hujayralari transplantatsiyasi bo‘yicha shifokorlarning malaka oshirishi, hamshiralarni tayyorlash masalasida qo‘limizdan kelgancha yordam berishga va o‘z tajribalarimizni o‘rtoqlashishga tayyormiz, — dedi professor Musa Karakukju.

Rossiya Milliy tibbiy radiologiya ilmiy markazi bosh direktori Andrey Kaprin Toshkentdagi Bolalar gematologiyasi, onkologiyasi va klinik immunologiyasi markazi ko‘p joylarda mavjud emasligini alohida ta’kidladi.

Aksar hollarda onkologik kasalliklarga uchragan bolalar umumiy poliklinikalarda davolanishadi. Bunday markazlarning bo‘lishi onkologik kasalliklarni chuqurroq o‘rganishga zamin yaratadi. Bundan tashqari, genetik, molekulyar o‘zgarishlar, miya transplantatsiyalari sohasida ilmiy izlanishlar olib borilayotgan Rossiya va boshqa dunyodagi eng tajribali markazlar bilan hamkorlik qilish imkonini beradi.

Men 30 dan ortiq o‘zbekistonlik mutaxassislarni taniyman, ular juda ham tajribali. Albatta, kadrlar eng asosiy ishni bajaradi. Shuning uchun bu kongress yosh mutaxassislarga loyihalarning ko‘lamini his qilish imkonini beradi va yangi yo‘nalishlarni anglashga xizmat qiladi.

Mamlakatingiz bunday kasalliklarga qarshi kurashishga bel bog‘lagan. Biz esa bunga yordam beramiz, — dedi Andrey Kaprin.

Respublika bolalar gematologiyasi, onkologiyasi va klinik immunologiyasi markazi bolalar jarrohi Tojiddin Mustafoyevning aytishicha, O‘zbekistonda 2030-yilga borib bolalar orasidagi xavfli o‘sma kasalliklardan tuzalish darajasini 60 foizdan oshirish rejalashtirilgan.

Bir yilda Respublikamizda 26 mingdan ortiq kishida xavfli o‘sma kasalligi aniqlansa, shuning o‘rtacha 3,5 foizini bolalar tashkil qiladi. Butun dunyoda ham xavfli o‘sma kasalliklarida bolalarning ulushi 3-5 foiz.

Bolalardagi xavfli o‘sma kasalliklari ba’zi bir jihatlari bilan kattalardagi o‘smalardan farq qiladi. Bugungi anjumanda aynan mana shu jihatlarga alohida e’tibor berilmoqda.

Bunda asosiy maqsad yetakchi mamlakatlarda qo‘llanayotgan tashxis qo‘yish va davolash standartlarini O‘zbekistonda ham amaliyotga joriy qilish. Bunda JSST bilan bizning hukumatimiz birgalikda 2030-yilga borib bolalar orasidagi xavfli o‘sma kasalliklaridan tuzalish darajasini 60 foizdan oshirishni rejalashtirmoqda, — dedi bolalar jarrohi Tojiddin Mustafoyev.

Ma’lumot uchun, O‘zbekiston Jahon sog‘liqni saqlash tashkiloti tomonidan bolalar saratoniga qarshi global tashabbusida ishtirok etish uchun tanlangan maqsadli mamlakatlar o‘ntaligi qatoriga kirdi. Bunda asosiy vazifalar zamonaviy diagnostika usullaridan foydalanishni yaxshilash, saraton va gematologik kasalliklarga chalingan bemorlarni davolash va qo‘llab-quvvatlash, shuningdek, terapiya samaradorligini va bolalarning umumiy farovonligini oshirishdan iborat.

Bundan tashqari, O‘zbekiston JSSTning bolalarni saraton kasalligidan davolash uchun dori vositalari bilan ta’minlash bo‘yicha global platformasida ishtirok etish uchun tanlab olindi. Unga asosan saraton kasalligiga chalingan bolalar uchun sifatli dori vositalarini uzluksiz qabul qilish hamda ularni bu yo‘nalishda har tomonlama qo‘llab-quvvatlash ko‘zda tutilgan. Dunyoda birinchi bo‘lgan ushbu platforma JSST va AQSHning Sent-Jud bolalar ilmiy-tadqiqot shifoxonasining loyihasi bo‘lib, bolalarni moliyaviy qiyinchiliklarsiz xavfsiz, samarali va sifatli saratonga qarshi dori vositalari bilan ta’minlashga qaratilgan. Dori vositalarini xarid qilish JSSTning texnik topshiriqlari asosida YUNICEF tomonidan amalga oshiriladi.

Toshkent shahrida 5–7-iyun kunlari o‘tkazilayotgan “Dalillarga asoslangan harakat” mavzusidagi bolalar onkologiyasi va gematologiyasi bo‘yicha I xalqaro kongressining asosiy maqsadi — xalqaro hamkorlikni yo‘lga qo‘yish, eng so‘nggi ilm-fan yutuqlari, ilg‘or diagnostika va davolash usullarini muhokama qilish, tibbiy yordam sifatini oshirish, bemorlarning ruhiy-ijtimoiy va madaniy holatlarini hisobga olgan holda ta’lim olishini qo‘llab-quvvatlash, O‘zbekistonda bolalar saratonini davolashda ilg‘or xalqaro va innovatsion amaliyotlarni joriy qilishdir.