Болалар онкологияси ва гематологияси бўйича I халқаро конгресси: асосий мақсад касалликни эрта аниқлаш ва даволаш даражасини ошириш

Тошкент шаҳрида бўлиб ўтаётган “Далилларга асосланган ҳаракат” мавзусидаги болалар онкологияси ва гематологияси бўйича I халқаро конгрессида иштирок этаётган мутахассислар мавзу юзасидан ўз мулоҳазаларини билдириб ўтди.

КANKA болалар гематологияси ва онкологияси ва суяк илиги трансплантацияси маркази раҳбари, Эрджиес университети тиббиёт факультети профессори Муса Каракукжу болаларнинг суяк кўмиги ўзак ҳужайралари трансплантацияси бўйича ҳамкорликда ишлашга тайёрлигини билдирди.

Ҳозирда Туркия соғлиқни сақлаш тизимида болаларнинг суяк кўмиги ўзак ҳужайралари трансплантацияси жуда яхши ривожланган. Европа бўйича кучли учталикка кирамиз: Германия, Италия ва Туркия.

Тошкентда жуда яхши Болалар гематологияси, онкологияси ва клиник иммунологияси маркази бор. Ўзбекистонда болаларнинг суяк кўмиги ўзак ҳужайралари трансплантацияси бўйича шифокорларнинг малака ошириши, ҳамшираларни тайёрлаш масаласида қўлимиздан келганча ёрдам беришга ва ўз тажрибаларимизни ўртоқлашишга тайёрмиз, — деди профессор Муса Каракукжу.

Россия Миллий тиббий радиология илмий маркази бош директори Андрей Каприн Тошкентдаги Болалар гематологияси, онкологияси ва клиник иммунологияси маркази кўп жойларда мавжуд эмаслигини алоҳида таъкидлади.

Аксар ҳолларда онкологик касалликларга учраган болалар умумий поликлиникаларда даволанишади. Бундай марказларнинг бўлиши онкологик касалликларни чуқурроқ ўрганишга замин яратади. Бундан ташқари, генетик, молекуляр ўзгаришлар, мия трансплантациялари соҳасида илмий изланишлар олиб борилаётган Россия ва бошқа дунёдаги энг тажрибали марказлар билан ҳамкорлик қилиш имконини беради.

Мен 30 дан ортиқ ўзбекистонлик мутахассисларни танийман, улар жуда ҳам тажрибали. Албатта, кадрлар энг асосий ишни бажаради. Шунинг учун бу конгресс ёш мутахассисларга лойиҳаларнинг кўламини ҳис қилиш имконини беради ва янги йўналишларни англашга хизмат қилади.

Мамлакатингиз бундай касалликларга қарши курашишга бел боғлаган. Биз эса бунга ёрдам берамиз, — деди Андрей Каприн.

Республика болалар гематологияси, онкологияси ва клиник иммунологияси маркази болалар жарроҳи Тожиддин Мустафоевнинг айтишича, Ўзбекистонда 2030 йилга бориб болалар орасидаги хавфли ўсма касалликлардан тузалиш даражасини 60 фоиздан ошириш режалаштирилган.

Бир йилда Республикамизда 26 мингдан ортиқ кишида хавфли ўсма касаллиги аниқланса, шунинг ўртача 3,5 фоизини болалар ташкил қилади. Бутун дунёда ҳам хавфли ўсма касалликларида болаларнинг улуши 3-5 фоиз.

Болалардаги хавфли ўсма касалликлари баъзи бир жиҳатлари билан катталардаги ўсмалардан фарқ қилади. Бугунги анжуманда айнан мана шу жиҳатларга алоҳида эътибор берилмоқда.

Бунда асосий мақсад етакчи мамлакатларда қўлланаётган ташхис қўйиш ва даволаш стандартларини Ўзбекистонда ҳам амалиётга жорий қилиш. Бунда ЖССТ билан бизнинг ҳукуматимиз биргаликда 2030 йилга бориб болалар орасидаги хавфли ўсма касалликларидан тузалиш даражасини 60 фоиздан оширишни режалаштирмоқда, — деди болалар жарроҳи Тожиддин Мустафоев.

Маълумот учун, Ўзбекистон Жаҳон соғлиқни сақлаш ташкилоти томонидан болалар саратонига қарши глобал ташаббусида иштирок этиш учун танланган мақсадли мамлакатлар ўнталиги қаторига кирди. Бунда асосий вазифалар замонавий диагностика усулларидан фойдаланишни яхшилаш, саратон ва гематологик касалликларга чалинган беморларни даволаш ва қўллаб-қувватлаш, шунингдек, терапия самарадорлигини ва болаларнинг умумий фаровонлигини оширишдан иборат.

Бундан ташқари, Ўзбекистон ЖССТнинг болаларни саратон касаллигидан даволаш учун дори воситалари билан таъминлаш бўйича глобал платформасида иштирок этиш учун танлаб олинди. Унга асосан саратон касаллигига чалинган болалар учун сифатли дори воситаларини узлуксиз қабул қилиш ҳамда уларни бу йўналишда ҳар томонлама қўллаб-қувватлаш кўзда тутилган. Дунёда биринчи бўлган ушбу платформа ЖССТ ва АҚШнинг Сент-Жуд болалар илмий-тадқиқот шифохонасининг лойиҳаси бўлиб, болаларни молиявий қийинчиликларсиз хавфсиз, самарали ва сифатли саратонга қарши дори воситалари билан таъминлашга қаратилган. Дори воситаларини харид қилиш ЖССТнинг техник топшириқлари асосида ЮНИСЕФ томонидан амалга оширилади.

Тошкент шаҳрида 5–7 июнь кунлари ўтказилаётган “Далилларга асосланган ҳаракат” мавзусидаги болалар онкологияси ва гематологияси бўйича I халқаро конгрессининг асосий мақсади — халқаро ҳамкорликни йўлга қўйиш, энг сўнгги илм-фан ютуқлари, илғор диагностика ва даволаш усулларини муҳокама қилиш, тиббий ёрдам сифатини ошириш, беморларнинг руҳий-ижтимоий ва маданий ҳолатларини ҳисобга олган ҳолда таълим олишини қўллаб-қувватлаш, Ўзбекистонда болалар саратонини даволашда илғор халқаро ва инновацион амалиётларни жорий қилишдир.