Madridning “Real” klubi va Fransiya terma jamoasi hujumchisi Kilian Mbappe golli uzatma berish bo‘yicha terma jamoa tarixida ikkinchi o‘rinni egalladi. Bu haqda Opta Sport xabar bermoqda.
![](/static/2024/06/06/mbappe-oboshyol-anri-i-zidana-po-odnomu-statisticheskomu-pokazatelyu-v-istorii-sbornoj-fra_17176388251486863502-dYadMhhL.jpg)
Manbaga ko‘ra, 5-iyun kuni Mbappening Lyuksemburg terma jamoasi bilan o‘rtoqlik uchrashuvida (3:0) Randal Kolo Muaniga golli uzatmasi Mbappe uchun fransuzlar safidagi 27-assisti bo‘ldi. 25 yoshli fransuz bu ko‘rsatkich bo‘yicha afsonaviy Tyerri Anri va 26 golli uzatmaga ega Zinedin Zidanni ortda qoldirdi. Mbappedan ko‘ra ko‘proq uzatmani Antuan Grizmann oshirgan. Futbolchi Fransiya terma jamoasidagi o‘yinlarda 30 bor gollarga hammualliflik qilgan.
Mbappe Lyuksemburgga qarshi o‘yinda gol urishga ham muvaffaq bo‘ldi. Futbolchining 85-daqiqada urgan goli fransuzlarga yirik g‘alabani ta’minladi.
Fransiya terma jamoasi 2024-yilda Germaniyada bo‘lib o‘tadigan Yevropa chempionatida ishtirok etadi. Turnir 14-iyundan 14-iyulga qadar davom etadi. Guruh bosqichida birinchi va ikkinchi o‘rinni egallagan jamoalar hamda uchinchi o‘rinni egallagan to‘rtta eng yaxshi jamoa 1/8 finalga yo‘l oladi.
Turnirning pley-off bosqichi olimpiya tizimi bo‘yicha davom ettiriladi: mag‘lub bo‘lgan jamoa musobaqani tark etadi. Yevro—2024 da fransuzlar Polsha, Avstriya va Gollandiya bilan “B” guruhida o‘ynaydi.
![](/static/2024/06/06/Screenshot 2024-06-06 094800-3QP4VMLk.png)
Fransiya terma jamoasi FIFA reytingida jahonda ikkinchi o‘rinda qayd etilgan. Reytingda yetakchi Argentina amaldagi jahon chempioni hisoblanadi. Kuchli uchlikni Belgiya jamoasi egallab turibdi.