Indoneziyada yangi poytaxt qurilishi uchun masʼul bo‘lgan tashkilot rahbari va uning o‘rinbosari kutilmaganda isteʼfoga chiqdi. Bu haqda Jakartadagi mahalliy manbalar tarqatgan xabarlarga asoslanib, CNN maʼlum qilgan.
Qurilish bo‘yicha masʼul tashkilot rahbariyati 3-iyun kuni lavozimidan ketgani eʼlon qilingan. Eʼtiborli vakillarning isteʼfoga chiqishi sabablari maʼlum emas.
Yuz bergan holat mamlakat keng jamoatchiligi ichida yangi shahar qurilishi to‘xtashi haqidagi muhokamalarni ko‘paytirgan. Rasmiylar rahbariyatdagi muammolar loyihaning iqtisodiy asosi puxta ishlab chiqilmagani ortidan yuzaga kelganini bildirgan.
Hozirda Indoneziya poytaxti Jakartada 10 milliondan ortiq fuqaro istiqomat qiladi. Ushbu shahar Yava orolida joylashgan bo‘lib, hamisha gavjum va tirband hudud hisoblanadi. Shaharda doimiy ravishda suv toshqinlari kuzatiladi, qirg‘oqbo‘yi hududlarda tuproq qatlamning dengizga faol cho‘kishi hodisasi yuz bermoqda.
Hukumat mavjud iqlim muammolari ortidan poytaxtni Sharqiy Kalimantan hududiga ko‘chirishga qaror qilgan. Ushbu viloyatning Borneo o‘rmonlari hududida yangi — Nusantara shahrini qurish ishlari boshlab yuborilgan edi.
Indoneziya prezidenti Joko Vidodo Instagram sahifasida fuqarolar uchun murojaat qoldirib, qurilish davom etishini bildirgan. Qurilish loyihasiga yangi rahbarlar tayinlangani va faol surʼatda ishlar ketayotgani aytilgan.
Loyihani hozirga qadar boshqargan Osiyo taraqqiyot bankining sobiq xodimi Bambang Susantono va uning o‘rinbosari, arxitektor va sobiq ko‘chmas mulk sotuvchisi Dhoni Raxajoe jurnalistlarga izoh berishdan bosh tortgan.
Izoh (0)