Индонезияда янги пойтахт қурилиши учун масъул бўлган ташкилот раҳбари ва унинг ўринбосари кутилмаганда истеъфога чиқди. Бу ҳақда Жакартадаги маҳаллий манбалар тарқатган хабарларга асосланиб, CNN маълум қилган.
Қурилиш бўйича масъул ташкилот раҳбарияти 3 июнь куни лавозимидан кетгани эълон қилинган. Эътиборли вакилларнинг истеъфога чиқиши сабаблари маълум эмас.
Юз берган ҳолат мамлакат кенг жамоатчилиги ичида янги шаҳар қурилиши тўхташи ҳақидаги муҳокамаларни кўпайтирган. Расмийлар раҳбариятдаги муаммолар лойиҳанинг иқтисодий асоси пухта ишлаб чиқилмагани ортидан юзага келганини билдирган.
Ҳозирда Индонезия пойтахти Жакартада 10 миллиондан ортиқ фуқаро истиқомат қилади. Ушбу шаҳар Ява оролида жойлашган бўлиб, ҳамиша гавжум ва тирбанд ҳудуд ҳисобланади. Шаҳарда доимий равишда сув тошқинлари кузатилади, қирғоқбўйи ҳудудларда тупроқ қатламнинг денгизга фаол чўкиши ҳодисаси юз бермоқда.
Ҳукумат мавжуд иқлим муаммолари ортидан пойтахтни Шарқий Калимантан ҳудудига кўчиришга қарор қилган. Ушбу вилоятнинг Борнео ўрмонлари ҳудудида янги — Нусантара шаҳрини қуриш ишлари бошлаб юборилган эди.
Индонезия президенти Жоко Видодо Instagram саҳифасида фуқаролар учун мурожаат қолдириб, қурилиш давом этишини билдирган. Қурилиш лойиҳасига янги раҳбарлар тайинлангани ва фаол суръатда ишлар кетаётгани айтилган.
Лойиҳани ҳозирга қадар бошқарган Осиё тараққиёт банкининг собиқ ходими Бамбанг Сусантоно ва унинг ўринбосари, архитектор ва собиқ кўчмас мулк сотувчиси Дҳони Рахажоэ журналистларга изоҳ беришдан бош тортган.
Изоҳ (0)