Eron oliy diniy rahnamosi Sayid Ali Xomanaiy 30-may kuni Tehronda Suriya prezidenti Bashar Asad bilan uchrashuv o‘tkazgan. Bu haqda Eron manbalariga tayanib, Al Arabia nashri xabar berdi.
Manbada aytilishicha, Suriya prezidenti Bashar Asad yaqinda vertolyot halokati oqibatida vafot etgan Eron sobiq prezidenti Ibrohim Raisiy o‘limi munosabati bilan hamdardlik izhor qilish uchun Eronga shaxsan tashrif buyurgan. Eron oliy diniy rahnamosi Xomanaiy Asadga hamdardlik va qiyin damda qo‘llab-quvvatlov uchun minnatdorchilik bildirgan.
Uchrashuvda Xomanaiy AQSH va Yevropaning Tehron va Damashqqa nisbatan siyosiy va iqtisodiy bosimini yengib o‘tish uchun Eron va Suriya o‘rtasidagi hamkorlikni kuchaytirishga chaqirgan.
Eron Suriyadagi 13 yillik fuqarolar urushi davrida Bashar Assadning asosiy ittifoqchisi bo‘lib, iqtisodiy, siyosiy va harbiy yordam ko‘rsatib kelishi aytiladi. Eron Islom inqilobi qo‘riqchilari korpusi bilan aloqador qurolli guruhlar Suriyada sezilarli darajada harbiy ishtirokni amalga oshirsa-da, Tehron mojaro hududiga faqat harbiy maslahatchilar yuborganini taʼkidlab keladi.
Eron va Suriya rahbarlari uchrashuvida Raisiy davrida birinchi vitse-prezident bo‘lgan Muhammad Moxber ham ishtirok etgan. Sobiq prezident vafotidan so‘ng, mavjud tartibga muvofiq Muhammad Moxber vaqtinchalik prezident etib tayinlangan.
“Endi janob Moxber prezident vakolatlariga ega bo‘lib, Eron-Suriya aloqalarini mustahkamlashda Raisiy kabi yondashuvni davom ettirmoqda”, — degan uchrashuvdan so‘ng Sayid Ali Xomanaiy.
Bashar Asad bilan yopiq, mazmuni oshkor qilinmagan suhbat bo‘lgani ham xabar berilgan.
Izoh (0)