AQSH Mudofaa vazirligi amerikalik harbiylarga xususiy kompaniyalar sun’iy yo‘ldoshlaridan harbiy maqsadlarda foydalanish imkonini beruvchi fuqaroviy kosmik zaxira dasturini ishga tushirdi. Bu haqda DefenceOne nashri xabar berdi.
Xabarga ko‘ra, SpaceX rahbari Ilon Mask 2022-yil oxirida Ukraina armiyasining Rossiya qo‘shinlariga qarshi rejalashtirilgan zarbasini to‘xtatib qo‘ygan va u to‘satdan Starlink sun’iy yo‘ldoshlarining unda ishtirok etmasligiga qaror qilgan.
Ukrainada sodir bo‘lgan voqea zaxiraning yaratilishiga sabab bo‘ldi, o‘sha paytda biz SpaceX bilan shartnoma tuzmagan edik, shuning uchun ular bizga ixtiyoriy ravishda yordam berdi, natijada biz undan har doim ham foydalana olmaganmiz, — deydi AQSH Koinot kuchlari tijorat boshqarmasi rahbari, polkovnik Richard Naysli.
Bunday hodisalar takrorlanmasligi uchun AQSH Mudofaa vazirligi xususiy kompaniyalarni fuqarolik kosmik zaxiralari dasturiga qo‘shilishga ko‘ndirishni rejalashtirmoqda.
AQSH shartlariga ko‘ra, xususiy kompaniyalar AQSH harbiylariga o‘z sun’iy yo‘ldoshlaridan harbiy maqsadlarda foydalanish imkoniyatini taqdim etishlari hamda qurolli mojarolarda AQSH ittifoqchilarini qo‘llab-quvvatlashi shart.
Shu bilan birga, Naysli Pentagon dasturning potensial ishtirokchilariga qanday imtiyozlarni taklif qilmoqchi ekanligini ochiqlamagan va bu masala hali ham ishlab chiqilayotganini ta’kidlagan.
Izoh (0)