Ispaniya chempionatining 38-turi doirasida “Real” 25-may, shanba kuni o‘z maydonida “Betis”ga qarshi bahs olib bordi.
O‘yin 0:0 hisobida yakunlandi. Madridliklar darvozasini Tibo Kurtua va Kepa Arrizabalaga navbat bilan qo‘riqladi — belgiyalik darvozabon 63 daqiqa harakat qildi, shundan so‘ng ispaniyalik futbolchi zaxiradan maydonga tushdi.
Birinchi bo‘limda “Betis” o‘yinchisining ofsayd sabab urilgan goli bekor qilindi. Jamoa bosh murabbiyi Karlo Anchelotti tanaffus vaqtida aytganidek, bu epizodda Kurtua unchalik ishonchli o‘ynamadi. “Tibo, biz finalga yetti kun qolganida bunday ishonchsiz o‘yinni ko‘rsata olmaymiz”, — deb e’tiroz bildirgan Karlo Anchelotti. Bu haqda Real Madrid Exclusivo xabar bermoqda.
Eslatib o‘tamiz, ko‘plab muxlis va mutaxassislar 1-iyun kuni Dortmundning “Borussiya”si bilan Chempionlar Ligasi finalida “Real” darvozasini kim qo‘riqlashi haqida bahs olib bormoqda. Mutaxassislarning aksar qismi Tibo Kurtua darvozani egallashiga ishonsa, boshqa qismi mavsumning asosiy qismini maydonda o‘tkazgan Andrey Luninning musobaqa finalida ishtirok etishiga ishonmoqda.
Izoh (0)