Futbol bo‘yicha Yevropa Chempionlar Ligasining yarim final javob o‘yida “Real” va “Bavariya” 8-may, chorshanba kuni o‘zaro to‘qnash keladi. Dastlabki o‘yin Germaniyada bo‘lib o‘tgan edi. Unda durang natija qayd etilgan. “Santiago Bernabeu”da o‘tkaziladigan javob uchrashuviga oid ma’lumotlar va qiziqarli faktlar taqdim etiladi.
Ispaniya. Madrid. “Santiago Bernabeu”
8-may, chorshanba
“Real” –“Bavariya” 00:00
Bosh hakam: Shimon Marchinyak (Polsha)
“Real Madrid”
Karlo Anchelotti jamoasi bir nechta frontda kurash olib bordi. Ispaniya Primerasida muddatidan oldin chempionga aylandi.
“Bavariya”ga qarshi 2:2 hisobida durangdan so‘ng madridiklar “Kadis”ni 3:0 hisobida taslim etdi. “Real” so‘nggi 5 o‘yinning 3 tasida g‘alaba qozondi. Ushbu o‘yinlarda 10 ta gol urib, 5 ta golni o‘z darvozasidan olib chiqdi.
David Alaba jarohati sababli “qaymoqranglilar”ga yordam bera olmaydi. Uzoq muddatga safdan chiqqan darvozabon Tibo Kurtua nihoyat tarkibga qaytdi.
“Bavariya”
Myunxenliklar chempionatda muvaffaqiyatsizlikka uchradi. Hozirda jamoa 2-o‘rinda bormoqda. Bundesligadagi so‘nggi o‘yin ham Myunxen jamoasi uchun omadsiz kechdi. Jamoa “Shtutgart”ga 1:3 hisobida mag‘lub bo‘ldi.
Chempionlar Ligasida klub finalga chiqish uchun jiddiy harakat qiladi.
Rafael Gerreyru va Kingsli Koman jarohati sababli jamoaga yordam bera olmaydi.
“Bavariya” so‘nggi 5 o‘yinda 3 ta g‘alabaga erishdi. Bu o‘yinlarda jamoa 11 ta gol urgan va 7 ta gol o‘tkazib yuborgan.
O‘yin oldidan qiziqarli faktlar:
Myunxenliklar so‘nggi 2 o‘yinda g‘alaba qozona olmayapti;
Madridliklar 6 yildan buyon “Bavariya”ni yenga olmayapti;
“Bavariya” hujumchisi Harri Keyn musobaqada 8 ta golga mualliflik qilgan.
“Real” — “Bavariya” o‘zaro o‘yinlar tarixiga nazar:
Yevropaning ikki grandi qit’alar darajasida juda ko‘p to‘qnash kelgan, shulardan 17 tasi Chempionlar Ligasiga to‘g‘ri keladi. Ustunlik — “Real”da. Madridliklar o‘zaro o‘yinlarda 9 ta g‘alabaga erishgan. 5 ta mag‘lubiyat va 3 ta durang qayd etgan.
Bundan avvalgi Chempionlar Ligasidagi to‘qnashuv 2018-yil bahoriga to‘g‘ri kelgan. Ikki o‘yin natijasiga ko‘ra “qaymoqranglilar” (2:2, 2:1) finalga yo‘l olgan. Kiyev finalida madridliklar “Liverpul”ni yengib, shohsupaga ko‘tarilgandi.
So‘nggi o‘yin esa o‘tgan hafta Myunxenda bo‘lib o‘tdi va unda 2:2 hisobidagi durang natija qayd etildi.
Murabbiylarning o‘yin oldi fikrlari
Bor kuchimiz bilan harakat qilishimiz kerak, bu — yarim final. Hayajon bor, bizga qiyin bo‘ladi. Birinchi o‘yinda raqibimiz bizdan yaxshiroq o‘ynadi.
Bu klublar bir-biriga o‘xshaydi. Ikkalasida ham buyuk an’ana bor. Bu o‘yinga optimizm bilan qaray olmaymiz, lekin umid qilamiz.
Darvozani Lunin qo‘riqlaydi. Kurtuaning ham holati yaxshi, lekin unga hali vaqt kerak.
Karlo Anchelotti, “Real” bosh murabbiyi
“Madrid stadioni g‘alaba qozonish qiyin bo‘lganlaridan biri. Lekin bu imkonsiz narsa emas. Birinchi o‘yinda yaxshi harakat qildik, biroq g‘alaba qozonmadik.
“Real” o‘z uyida o‘ynagani hisobiga 51% ustunlik ularda bo‘lishi mumkin. Bu aniq. Biz ham Yevropaning katta klublaridan birimiz.
Finalga chiqishni xohlaymiz. “Uembli”da o‘ynash uchun maydonga tushamiz.
Tomas Tuxel, “Bavariya” bosh murabbiyi
“Real” va “Bavariya” o‘rtasidagi uchrashuv O‘zbekiston vaqti bilan 8-maydan 9-mayga o‘tar kechasi 00:00 da start oladi.
Izoh (0)