Sog‘liqni saqlash vazirining buyrug‘i bilan Davlat sog‘liqni saqlash organlarining qurolga egalik qilishga qarshi ko‘rsatmalar mavjud emasligi yuzasidan tibbiy tekshiruvdan o‘tkazishni amalga oshirishga ruxsat berilgan tibbiyot muassasalari ro‘yxati, tibbiy tekshiruvni o‘tkazganlik uchun tarifning miqdori va tibbiy tekshiruv natijalariga doir xulosaning shakli tasdiqlandi.
“Qurol to‘g‘risida”gi qonunning 13-moddasiga muvofiq O‘zbekiston fuqarolari va maxsus xizmat vazifalariga ega bo‘lgan yuridik shaxslarning xodimlari ichki ishlar organlarining yo‘llanmalari bo‘yicha davlat sog‘liqni saqlash organlarining tibbiyot muassasalarida qurolga egalik qilishga qarshi ko‘rsatmalar mavjud emasligi yuzasidan davriy tibbiy tekshiruvlardan o‘tishi kerak. To‘liq ro‘yxat bilan quyidagi havola orqali tanishish mumkin.
Tibbiy tekshiruv kasalliklar yoki jismoniy nuqsonlar mavjud emasligini aniqlash maqsadida pulli asosda o‘tkaziladi.
Hujjat qonun hujjatlari maʼlumotlari milliy bazasida eʼlon qilingan va 2023-yil 10-noyabrdan kuchga kirdi.
O‘zbekistonda “Qurol to‘g‘risidagi” qonun 2019-yil 29-iyulda prezident tomonidan imzolangan. Fuqaroviy va xizmat quroli hamda uning o‘q-dorilarini ishlab chiqarish, ta’mirlash va realizatsiya qilish bo‘yicha faoliyat faqat O‘zbekiston hududida belgilangan tartibda ro‘yxatdan o‘tgan yuridik shaxslar tomonidan amalga oshiriladi. O‘zbekistonda noqonuniy saqlangan qurollarni o‘z ixtiyori bilan IIVga topshirganlarga pul mukofoti beriladi.
2022-yilda “Prokuratura to‘g‘risida”gi qonunga kiritilgan o‘zgartirishlarga ko‘ra, prokuratura organlari xodimlari xizmat quroli va shaxsiy himoya vositalarini qonunchilikda belgilangan tartibda saqlash, olib yurish hamda ulardan foydalanish huquqiga egaligi belgilangandi (ilgari faqatgina olib yurishi mumkinligi ko‘rsatilgan).
Izoh (0)