Ijtimoiy tarmoqlarda, asli o‘zbekistonlik bo‘lgan, hozirda Kanada fuqaroligiga ega, MLS o‘rinbosarlar ligasida to‘p tepayotgan Kamron Habibulloh Parijda bo‘lib o‘tadigan Olimpiadada O‘zbekiston terma jamaosi tarkibiga jalb qilinishi haqida xabar tarqaldi.
X (sobiq Twitter) ijtimoiy tarmog‘idagi Scout in Eurasia sahifasida tarqalgan xabar yuzasidan “Daryo” sahifa yurituvchisi Galimjan Askaruli bilan bog‘landi.
Ushbu xabar yuzasidan bayonot so‘ralganida, sahifa yurituvchisi avvaliga bu xabarni O‘zbekiston futbol assotsiatsiyasidagi tanishlari orqali bilib olganini, futbolchining otasi ham bunga qarshi emasligi haqida aytgan.
Uning fikricha, futbolchiga O‘zbekiston fuqaroligini berish va tarkibga jalb qilishda hech qanday muammo ro‘y bermaydi.
“Daryo”ning O‘zbekiston futbol assotsiatsiyasidagi manbasi bu xabarni rad etib, hech qaysi davlatdan futbolchilarni mahalliylashtirish rejasi ko‘rib chiqilmayotganini aytib o‘tgan.
Sahifa egasiga bu haqda ma’lumot berilganda, futbolchini mahalliylashtirish uning taklifi ekanini iddao qilgan.
Kamron Habibulloh 2003-yilda Toshkent shahrida tug‘ilgan. Futbolchi hozirda Kanada U-20 terma jamoa a‘zosi hisoblanadi. Habibulloh Sporting Kanzas Siti II klubi safida MLS Next Pro chempionati doirasida joriy mavsumda 7 ta o‘yinda maydonga tushib, 7 ta gol urgan.
Kamron Kanada U-17 va U-20 terma jamoalari safida KONKAKAF va U-17 Jahon kubogi musobaqalarida qatnashgan.
Chap qanot yarim himoyachisi hisoblangan futbolchi Transfermarkt nashri tomonidan 200 ming yevroga baholangan.
Izoh (0)