Armaniston hukumati Rossiya rahbariyatiga murojaat qilib, Turkiya va Eron bilan chegarani qo‘riqlashda yordam berishni so‘ragan. Bu haqda Rossiya Federal xavfsizlik xizmati tarqatgan maʼlumotga asoslanib, “Interfaks” nashri xabar berdi.
Rossiya Federatsiyasi Federal xavfsizlik xizmati direktori lavozimiga nomzod Aleksandr Bortnikovning maʼlum qilishicha, Armaniston tomoni Rossiyadan mamlakat hududida chegarachilarning mavjudligini saqlab qolishni so‘ragan. Bunga asos sifatida janubiy va g‘arbiy chegara hududlarida xavf darajasi saqlanib qolayotganini keltirgan.
“Armanistonda chegarachilarimizni saqlab qolmoqdamiz. Armanistonlik hamkorlarimiz bizdan Turkiya va Eron bilan chegarani qo‘riqlash bo‘yicha funksional majburiyatlarni bajarishni davom ettirishimizni so‘rashmoqda”, — degan Bortnikov.
Rossiya rasmiysiga ko‘ra, arman tomoni Rossiya hukumatidan Zvartnots xalqaro aeroportidagi chegara nazorat punktini yopishni ham iltimos qilgan. Rossiya yaqin kelajakda buni amalga oshirishni rejalashtirganini bildirgan.
Rossiya hukumati chegara xizmati tezkor guruhlarini Armaniston-Ozarbayjon chegarasidagi demarkatsiya chizig‘idan olib chiqish to‘g‘risida qaror qabul qilinganini maʼlum qilgan. Bu qaror bilan Boku va Yerevan o‘rtasida joylashtirilgan rus harbiy kontingentlari hududdan to‘liq olib chiqilishi kafolatlangan.
“Armaniston tomoni vaqtinchalik tezkor guruhlarni chegara chizig‘idan olib chiqib ketishni va hech qanday tarzda qonuniy belgilanmagan hududlarda askarlar bo‘lishi muammosini yopishni so‘radi”, — degan Bortnikov Federatsiya Kengashida o‘tkazilgan yig‘ilishda.
Ushbu to‘g‘risidagi qaror 8-may kuni Moskvada Armaniston bosh vaziri Nikol Pashinyan va Rossiya prezidenti Vladimir Putin o‘rtasidagi uchrashuvda kelishilgani maʼlum qilingan. Kelishuv yakunlari bo‘yicha amaliy harakatlarga kirishilishi bildirilgan.
Izoh (0)