Toshkent, Navoiy va Samarqand viloyatlarida kredit mablag‘larini talon-toroj qilgan MCHJlar aniqlandi, deb xabar beradi Bosh prokuratura huzuridagi departament.
Qayd etilishicha, departamentning Chirchiq shahar bo‘limi tomonidan tergovga qadar tekshiruv o‘tkazilgan. Tekshiruvda “A.B.” MCHJ masʼul shaxslari tijorat banki filialidan nooziq-ovqat mahsulotlari chakana savdosi faoliyatini tashkil etish maqsadida ajratilgan kredit mablag‘i hisobiga xorijdan olib kelingan qurilish mollarini boshqa shaxslarga naqd pulga sotib yuborib, 120 ming dollar miqdoridagi kreditni o‘zlashtirish yo‘li bilan talon-toroj qilgani aniqlangan.
Shu kabi, departamentning Navoiy shahar bo‘limi tomonidan o‘tkazilgan tergovga qadar tekshiruvda “A.” MCHJ hamda “I.O.” oilaviy korxonasini norasmiy boshqarib kelgan A.S. zamonaviy mehmonxona xizmatini tashkil qilish uchun hududiy tijorat banki filialidan 3 milliard so‘m kredit ajratilishiga erishib, amalda mehmonxona xizmatini tashkil qilmasdan kredit mablag‘larni o‘zlashtirish yo‘li bilan talon-toroj qilgani ma’lum bo‘ldi.
Departamentning Kattaqo‘rg‘on shahar bo‘limi tomonidan o‘tkazilgan tergovga qadar tekshiruvda esa “A.G.” MCHJ masʼul shaxslari hududiy tijorat banki filialidan ajratilgan kredit mablag‘lari hisobidan AYQSH binosini taʼmirlash ishlarini to‘liq amalga oshirmasdan jami 602,6 million so‘m kreditni o‘zlashtirish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi. Shuningdek, Toshkent viloyatida fermer xo‘jaligi 3,1 mlrd so‘m imtiyozli kredit mablag‘ini o‘zlashtirgani ma’lum bo‘lgan edi.
Izoh (0)