Қорақалпоғистон Республикаси, Тошкент ва Самарқанд вилоятларида кредит маблағларини талон-торож қилган МЧЖлар аниқланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Беруний туман бўлими томонидан терговга қадар текширув ўтказилган. Текширувда “А.А.” МЧЖ масъул шахслари ва бошқалар ишлаб чиқариш цехи биносини сохта ҳужжатлар билан гаровга қўйиб, наслли чорва молларини олиб келиш мақсадида тижорат банки филиалидан ажратилган 666,6 миллион сўм кредитни ўзлаштириш йўли билан талон-торож қилгани аниқланган.
Шу каби, департаментнинг Янгийўл шаҳар бўлими томонидан ўтказилган терговга қадар текширувда “C.И.” МЧЖ раҳбари М.Д. ва бошқалар ўзаро тил бириктириб, 24 нафар фуқарога 12 ой давомида бўлиб-бўлиб тўлаш шарти билан маиший техника харид қилиш учун онлайн шартномалар тузиш орқали уларнинг номига пластик карталар очиб, ушбу пластик карталарга тушган жами 531,2 миллион сўм кредит маблағини нақдлаштириб олиб, талон-торож қилгани маълум бўлган.
Департаментнинг Самарқанд шаҳар бўлими томонидан ўтказилган терговга қадар текширувда “Ф.Б.”, “И.З.”, “А.А.”, “М.ф.” ва “С.А.” корхонаси масъул шахслари ва бошқалар ажратилган кредит маблағи эвазига харид қилган тикув машиналари ва ишлаб чиқариш жиҳозларини сотиб юбориб, 257,6 миллион сўм кредитни ўзлаштириш йўли билан талон-торож қилганликлари ҳамда банкнинг қатъий ҳисобидаги кредит расмий ҳужжатларини қасддан нобуд қилгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Сурхондарёда хусусий боғча қуриш учун ажратилган 356 млн сўм кредит маблағи талон-торож қилингани тўғрисида хабар берилганди. Шунингдек, Тошкент вилоятида фермер хўжалиги 3,1 млрд сўм имтиёзли кредит маблағини ўзлаштиргани маълум бўлган эди.
Изоҳ (0)