Спорт билан шуғулланиш инсонни ҳам руҳан, ҳам жисмонан бақувват қилади. Масалан, эрта тонгдан бажарилган машқлар инсонга кун давомида тетиклик ҳамда яхши кайфият бахш этади. Навқирон инсон бўла туриб спорт билан шуғулланиш бир гап, лекин 70 ёшдан ошганда ҳам спорт билан ҳамнафас яшаб келаётган инсонлар орамизда жуда кам.
“Дарё” журналисти Сардор Али мана шундай кам сонли инсонлардан бир, ёши 72 да бўлишга қарамасдан ҳар куни спорт залида машқ қилувчи отахон – Ўлмас Охунжонов билан суҳбатлашди.
— Қанча вақтдан бери спорт билан шуғулланиб келасиз? Спортга бўлган бу даражадаги муҳаббатингизнинг боиси нимада?
— Мени исмим Охунжонов Ўлмас. Спорт билан мактаб вақтидан бери шуғулланиб келаман. 40 йилдан бери машқ қиламан. Ҳозир 72 ёшдаман. Спорт муҳаббат қўйишимда Брюс Лининг ҳиссаси катта. Мен ёшлигимда Жан Клод Ван Дамм, Арнольд Шварценеггер ва Деҳигинларга ҳавас қилганман. Биринчи тош кўтариш билан шуғулланганман. Бу спорт турида кандидат мастер даражасига чиққанман. Ундан кейин самбо ва дзюдога қизиқиб қолиб, шуғулланишни бошлаганман.
— Фитнес залидаги тошлар сиз учун оғирлик қилмайдими? Бир кунда неча соат машқ қиласиз?
— Аслида касбим қурувчи. 8 йилдан бери шу машғулот залига келаман. Менга тошларни кўтариш қийин эмас, қайтага шуғулланиб завқ ва куч оламан. Мен ҳар куни машқ қиламан. Фақат рамазон ойида бир ой залга чиқмадим. Бир кунда 3-4 соат машқ қиламан. Олдин ҳам спорт билан шуғулланганим учун бу ердаги тошларни ўйинчоқ қилиб ташлайман. Мен оғир кўтаришдан қўрқмайман. Чунки олдиндан шуғулланиб келганман.
— Машқлар давомида жароҳат олишдан қўрқмайсизми?
— Мушакларнинг ривожланиши бажарилаётган машқнинг техникасига боғлиқ. Бу спорт турида нотўғри машқ қилсангиз, асосий юклама белга келиб тушади. Шунинг учун машқ қилишдан олдин танани қизитиб олиш зарур. Агар бадан қизимаса, лат ейишингиз мумкин.
— Биламизки, спорт билан шуғулланган одам овқатланишга ҳам эътибор қаратиши лозим. Сиз қандай маҳсулотлар истеъмол қиласиз?
— Мен нонуштага 5 та бедана тухуми қовуриб ейман. Ундан кейин чучварани қатиқ билан еб оламан. Организмга бир ҳафтада бир маротаба юклама бериш керак. Ҳозир қўл учун 15 кило тошни бемалол 20-25 маротаба кўтара оламан.
Изоҳ (0)