Isroil mudofaa kuchlarining beshta bo‘linmasi falastinliklarning huquqlarini qo‘pol ravishda buzgan. Ammo bu G‘azo sektorida emas, balki 2023-yil 7-oktyabrdan ancha oldin sodir bo‘lgan. Bu haqda davlat departamenti matbuot xizmati rahbari o‘rinbosari Vedant Patelga tayanib, Reuters xabar berdi.
“Chuqur protsessdan so‘ng beshta Isroil bo‘linmasi inson huquqlarini qo‘pol ravishda buzgani uchun javobgar ekanini aniqladik. Bu hodisalarning barchasi 2023-yil 7-oktyabrdan ancha oldin sodir bo‘lgan va ularning hech biri G‘azo sektorida kuzatilmagan”, — dedi Patel.
Davlat departamentining ta’kidlashicha, beshta bo‘limdan to‘rttasi qonunbuzarliklarni tuzatgan.
21-aprel kuni AQSH davlat kotibi Entoni Blinken yaqin orada Isroil mudofaa kuchlarining “Netsax Iyeguda” batalyoniga qarshi G‘arbiy Sohilda inson huquqlarini buzgani uchun sanksiyalar e’lon qilishini aytdi.
Qaror davlat departamentining batalyon harakatlarini tekshirgan maxsus komissiyasi tavsiyasiga ko‘ra qabul qilingan. Tergov 2022-yilda “Netsax Iyeguda”ning Falastin fuqarolariga nisbatan zo‘ravonlik holatlariga aloqadorligi haqidagi dalillar tufayli boshlangan.
Ertasi kuni Al Jazeera G‘azo sektoridagi Xon Yunis shahridagi Nosir kasalxonasi yaqinidagi ommaviy qabrdan 210 kishining jasadi topilgani haqida xabar berdi. Hozirda ularning soni 400 ga yaqinlashgan.
Ommaviy qabr 20-aprel kuni isroillik harbiylar Xon Yunisni tark etgandan keyin topilgan. Al Jazeera xabariga ko‘ra, jasadlar Isroil harbiylari tomonidan kasalxona hududiga ko‘milgan. “Al Quds Al Arabi” gazetasining yozishicha, ular shu yo‘l bilan o‘z jinoyatlarini yashirmoqchi bo‘lgan. Jasadlar ko‘zdan kechirilganida ularning ayrimlarida qiynoq va qatl izlari bo‘lgan. Ba’zilar tiriklayin ko‘milgan bo‘lishi ham mumkin. AQSH mazkur ma’lumotdan xabardor ekanini bildirib, Isroildan bu borada hisobot berishni so‘ragan.
Izoh (0)