Исроил мудофаа кучларининг бешта бўлинмаси фаластинликларнинг ҳуқуқларини қўпол равишда бузган. Аммо бу Ғазо секторида эмас, балки 2023 йил 7 октябрдан анча олдин содир бўлган. Бу ҳақда давлат департаменти матбуот хизмати раҳбари ўринбосари Ведант Пателга таяниб, Reuters хабар берди.
“Чуқур процессдан сўнг бешта Исроил бўлинмаси инсон ҳуқуқларини қўпол равишда бузгани учун жавобгар эканини аниқладик. Бу ҳодисаларнинг барчаси 2023 йил 7 октябрдан анча олдин содир бўлган ва уларнинг ҳеч бири Ғазо секторида кузатилмаган”, — деди Пател.
Давлат департаментининг таъкидлашича, бешта бўлимдан тўрттаси қонунбузарликларни тузатган.
21 апрель куни АҚШ давлат котиби Энтони Блинкен яқин орада Исроил мудофаа кучларининг “Нэтсах Иегуда” батальонига қарши Ғарбий Соҳилда инсон ҳуқуқларини бузгани учун санкциялар эълон қилишини айтди.
Қарор давлат департаментининг батальон ҳаракатларини текширган махсус комиссияси тавсиясига кўра қабул қилинган. Тергов 2022 йилда “Нэтсах Иегуда”нинг Фаластин фуқароларига нисбатан зўравонлик ҳолатларига алоқадорлиги ҳақидаги далиллар туфайли бошланган.
Эртаси куни Al Jazeera Ғазо секторидаги Хон Юнис шаҳридаги Носир касалхонаси яқинидаги оммавий қабрдан 210 кишининг жасади топилгани ҳақида хабар берди. Ҳозирда уларнинг сони 400 га яқинлашган.
Оммавий қабр 20 апрель куни исроиллик ҳарбийлар Хон Юнисни тарк этгандан кейин топилган. Al Jazeera хабарига кўра, жасадлар Исроил ҳарбийлари томонидан касалхона ҳудудига кўмилган. “Ал Қудс Ал Араби” газетасининг ёзишича, улар шу йўл билан ўз жиноятларини яширмоқчи бўлган. Жасадлар кўздан кечирилганида уларнинг айримларида қийноқ ва қатл излари бўлган. Баъзилар тириклайин кўмилган бўлиши ҳам мумкин. АҚШ мазкур маълумотдан хабардор эканини билдириб, Исроилдан бу борада ҳисобот беришни сўраган.
Изоҳ (0)