Rossiyada faoliyat yuritayotgan Yevropaning yirik banklari 2023-yilda Rossiya byudjetiga 800 million yevrodan ortiq soliq to‘lagan. Bu Rossiya Ukrainaga bostirib kirishidan oldingi ko‘rsatkichdan to‘rt barobar ko‘pdir, deya xabar bermoqda Financial Times.
Yevropaning Raiffeisen Bank International, Unicredit, ING, Commerzbank, Deutsche Bank, Intesa Sanpaolo va OTP banklarining 2023-yildagi umumiy foydasi 3 milliard yevrodan oshdi.
Bu 2021-yilga nisbatan uch barobar ko‘p. Daromadning keskin oshishi tufayli banklar 2021-yildagi 200 million yevroga nisbatan 800 million yevroga yaqin soliq to‘lagan.
“Rossiyadagi G‘arb banklarining yuqori daromadlari Rossiyada ishlashda davom etayotgan xorijiy kompaniyalar mamlakatga sanksiyalar sharoitida moliyaviy barqarorlikni saqlashga qanday yordam berishini ko‘rsatadi”, — deyiladi xabarda.
Soliq to‘lovlarining yarmidan ko‘pi Raiffeisen Bank International hissasiga to‘g‘ri keladi. Financial Times Avstriya bank guruhining rejalarini tahlil qildi va uning Rossiyadagi sho‘ba korxonasining mijozlar bazasini kengaytirish bo‘yicha “ambitsiyali rejalari” bor degan xulosaga keldi.
Raiffeisen Bank International’ning o‘zi avvalroq Rossiyadagi biznesini qisqartirish rejalarini e‘lon qilgandi. Deutsche Bank, OTP va Commerzbank Rossiyadagi ishtirokini qisqartirgan. Intesa o‘z biznesini sotish jarayonida.
Amerika banklari Financial Times hisob-kitoblariga kiritilmagan, chunki ular o‘z hisobotlarida Rossiyadagi natijalarini oshkor etmagan. Kiyev iqtisodiyot maktabiga ko‘ra, Citigroup Rossiyaga 53 million dollar to‘lagan va G‘arb banklari orasida to‘rtinchi yirik soliq to‘lovchiga aylangan. JPMorgan uchun bu ko‘rsatkich 6,8 million dollarni tashkil etadi.
Bundan tashqari, Financial Times xorijiy banklar nafaqat foiz stavkasini oshirishdan, balki G‘arbning Rossiya banklariga nisbatan sanksiyalaridan ham foyda ko‘rganini yozmoqda. Rossiya kredit muassasalari xalqaro to‘lov tizimlariga kirish imkoniyatini yo‘qotgan, bu esa G‘arb banklarining faoliyatiga hissa qo‘shgan.
Izoh (0)