Sirdaryo viloyatida ijtimoiy tarmoq orqali fuqarolarni chuv tushirib kelgan yigit qo‘lga olindi, deb xabar beradi IIV Kiberxavfsizlik markazi.
Qayd etilishicha, Samarqand shahrida yashovchi 20 yoshli (ayol) B.X. IIOga murojaat qilib, bank kartasidan 2,4 million so‘m miqdoridagi pul mablag‘i nomaʼlum shaxs tomonidan firibgarlik yo‘li bilan o‘zlashtirilganini maʼlum qilgan.
Tezkor-qidiruv xizmati Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Sirdaryo viloyati Guliston shahrida yashovchi 18 yoshli M.A. sodir etgani aniqlangan.
Gumonlanuvchi sifatida tergov harakatlariga jalb etilgan, M.A. Instagram ijtimoiy tarmog‘i orqali “iPhone 12 pro sotiladi” deya yolg‘on eʼlon joylashtirgan va bu eʼlonga ishongan jabrlanuvchi B.X. bilan telefon orqali gaplashib, ishonchiga kirgan. U oldindan 2,4 million so‘m miqdoridagi pullarni o‘zining foydalanuvida bo‘lgan bank kartasiga o‘tkazib olgan va yozishmalarni o‘chirib yuborib, ayolning qo‘ng‘iroqlariga javob bermay, qora ro‘yxatga kiritib qo‘ygan.
Mazkur holat yuzasidan Jinoyat kodeksining 168-moddasi (firibgarlik) 2-qismi “b” bandi bilan jinoyat ishi qo‘zg‘atilib, M.A.ning sodir qilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tergov, tezkor-qidiruv harakatlari davom ettirilmoqda.
Avvalroq Surxondaryoda PUBG akkauntini sotishini aytib, firibgarlik sodir etgan 19 yoshli yigit ushlangani to‘g‘risida xabar berilgandi.
Izoh (0)