Isroil havo kuchlari 16-aprel kuni tashkil etgan hujum oqibatida “Hizbulloh” guruhi qo‘mondoni Ismoil Yusuf Baz halok bo‘ldi. Bu haqda Al Jazeera nashri xabar berdi.
Manbada aytilishicha, Isroil harbiylari Livan janubidagi Ayn-Baal shahrini havodan shturm qilgan. Livandagi “Hizbulloh” guruhiga aloqador qator obyektlarga shikast yetkazilgan.
Al Jazeera xabar berishicha, Ismoil Yusuf Baz “Hizbulloh”ning harbiy qanoti yetakchisi, yuqori martabali qo‘mondon va faxriy amaldor bo‘lgan. U Isroil shimoliga yo‘naltirilgan hujumlar rejasini ishlab chiqishda faol ishtirok etib kelgan.
“U o‘z lavozimining bir qismi sifatida Livandagi qirg‘oq hududidan Isroil davlati tomon raketa va tankka qarshi raketalarni uchirish va harakatlar rejasini ishlab chiqish bilan shug‘ullangan”, deyiladi rasmiy xabarda.
Avvalroq Isroil kuchlari Livan janubiga hujum uyushtirib, “Hizbulloh” guruhining raketa va uchar qurilmalar tarmog‘i rahbari o‘rinbosari Ali Abdul Hasan Naimni yo‘q qilgandi.
Izoh (0)