Исроил ҳаво кучлари 16 апрель куни ташкил этган ҳужум оқибатида “Ҳизбуллоҳ” гуруҳи қўмондони Исмоил Юсуф Баз ҳалок бўлди. Бу ҳақда Al Jazeera нашри хабар берди.
Манбада айтилишича, Исроил ҳарбийлари Ливан жанубидаги Айн-Баал шаҳрини ҳаводан штурм қилган. Ливандаги “Ҳизбуллоҳ” гуруҳига алоқадор қатор объектларга шикаст етказилган.
Al Jazeera хабар беришича, Исмоил Юсуф Баз “Ҳизбуллоҳ”нинг ҳарбий қаноти етакчиси, юқори мартабали қўмондон ва фахрий амалдор бўлган. У Исроил шимолига йўналтирилган ҳужумлар режасини ишлаб чиқишда фаол иштирок этиб келган.
“У ўз лавозимининг бир қисми сифатида Ливандаги қирғоқ ҳудудидан Исроил давлати томон ракета ва танкка қарши ракеталарни учириш ва ҳаракатлар режасини ишлаб чиқиш билан шуғулланган”, дейилади расмий хабарда.
Аввалроқ Исроил кучлари Ливан жанубига ҳужум уюштириб, “Ҳизбуллоҳ” гуруҳининг ракета ва учар қурилмалар тармоғи раҳбари ўринбосари Али Абдул Ҳасан Наимни йўқ қилганди.
Изоҳ (0)