Kolumbiya prezidenti Gustavo Petro Isroilni BMT Xavfsizlik kengashining G‘azoda o‘t ochishni to‘xtatish to‘g‘risidagi rezolyutsiyasiga bo‘ysunmaslikda aybladi. Bu haqda Anadolu nashri xabar berdi.
Manbaga ko‘ra, Kolumbiya rahbari Isroilni bu xatti-harakati uchun ochiqdan ochiq tanqid qilib, qoralagan. Tel-Avivni BMT xohish-irodasiga bo‘ysunishga chaqirgan.
Prezident Gustavo Petro, shuningdek, 15-aprel kuni Isroil tomonidan G‘azo sektorida tashkil etilgan yangi hujumlar masalasiga to‘xtalib, agressiyani to‘xtatishga chaqirgan. Insoniyatga qarshi hujum badali og‘ir ekanligini aytgan.
“Hujum yana boshlandi. Bolalarning o‘ldirilishi va BMT Xavfsizlik kengashining o‘t ochishni to‘xtatish qarorini ochiqchasiga buzish davom etmoqda. Insoniyatning katta qismi tinchlikni xohlaydi”, — degan Kolumbiya prezidenti.
Joriy yilning 25-mart kuni BMT Xavfsizlik kengashi G‘azoda o‘t ochishni zudlik bilan to‘xtatish, garovga olinganlarni shartsiz ozod etish hamda G‘azoga yordam oqimini kengaytirishni talab qilgan rezolyutsiyani qabul qilgan edi. Isroil hukumat ushbu rezolyutsiya talablarini bajarishdan bosh tortgan. AQSH rezolyutsiyada Isroilni qo‘llab ovoz bergan.
2023-yil 7-oktyabr kuni boshlangan HAMAS va Isroil urushi oqibatida G‘azo sektorida shu paytga qadar 33 700 nafardan ortiq falastinlik, asosan, ayollar va bolalar halok bo‘lgani aytiladi. 76 400 ga yaqin fuqaro esa turli darajadagi jarohatlar bilan shifoxonalarga yotqizilgan.
Birlashgan Millatlar Tashkiloti maʼlumotlariga ko‘ra, Isroil urushi G‘azo aholisining 85 foizini oziq-ovqat, toza suv va dori-darmonlarning keskin tanqisligi sharoitida ichki ko‘chishga majbur qilgan. Anklav infratuzilmasining 60 foizi shikastlangan yoki vayron bo‘lgan.
Izoh (0)