Колумбия президенти Густаво Петро Исроилни БМТ Хавфсизлик кенгашининг Ғазода ўт очишни тўхтатиш тўғрисидаги резолюциясига бўйсунмасликда айблади. Бу ҳақда Anadolu нашри хабар берди.
Манбага кўра, Колумбия раҳбари Исроилни бу хатти-ҳаракати учун очиқдан очиқ танқид қилиб, қоралаган. Тель-Авивни БМТ хоҳиш-иродасига бўйсунишга чақирган.
Президент Густаво Петро, шунингдек, 15 апрель куни Исроил томонидан Ғазо секторида ташкил этилган янги ҳужумлар масаласига тўхталиб, агрессияни тўхтатишга чақирган. Инсониятга қарши ҳужум бадали оғир эканлигини айтган.
“Ҳужум яна бошланди. Болаларнинг ўлдирилиши ва БМТ Хавфсизлик кенгашининг ўт очишни тўхтатиш қарорини очиқчасига бузиш давом этмоқда. Инсониятнинг катта қисми тинчликни хоҳлайди”, — деган Колумбия президенти.
Жорий йилнинг 25 март куни БМТ Хавфсизлик кенгаши Ғазода ўт очишни зудлик билан тўхтатиш, гаровга олинганларни шартсиз озод этиш ҳамда Ғазога ёрдам оқимини кенгайтиришни талаб қилган резолюцияни қабул қилган эди. Исроил ҳукумат ушбу резолюция талабларини бажаришдан бош тортган. АҚШ резолюцияда Исроилни қўллаб овоз берган.
2023 йил 7 октябрь куни бошланган ҲАМАС ва Исроил уруши оқибатида Ғазо секторида шу пайтга қадар 33 700 нафардан ортиқ фаластинлик, асосан, аёллар ва болалар ҳалок бўлгани айтилади. 76 400 га яқин фуқаро эса турли даражадаги жароҳатлар билан шифохоналарга ётқизилган.
Бирлашган Миллатлар Ташкилоти маълумотларига кўра, Исроил уруши Ғазо аҳолисининг 85 фоизини озиқ-овқат, тоза сув ва дори-дармонларнинг кескин танқислиги шароитида ички кўчишга мажбур қилган. Анклав инфратузилмасининг 60 фоизи шикастланган ёки вайрон бўлган.
Изоҳ (0)