Rossiyaning Orenburg shahrida 9-aprel kuni kechki soat 19:00 ga yaqin daryo suv sathi 9 metrga ko‘tarilishi ortidan ogohlantirish signallari chalindi. Bu haqda “TASS” nashri maʼlum qildi.
Shahar meri Sergey Salmin suv ostida qolishi mumkin bo‘lgan hududdan bolalar, qariyalar, nogironlar va uy hayvonlarini olib chiqishga chaqirgan. Favqulodda holatga tayyorgarlik ko‘rishga chaqirgan.
“Ural daryosidagi suv sathi keskin ko‘tarilib, 914 santimetrlik belgiga yetdi. Agar u 930 santimetrdan oshsa, yangi hududlarni suv bosadi. Vaziyat juda jiddiy, chunki suv tezda kirib kelishi mumkin”, — degan shahar hokimi bayonotda.
Shahar maʼmuriyati favqulodda vaziyatlar qutqaruv brigadalarini hududga jalb qilgan. Toshqin ostida qolganlar qutqarib olinayotgani aytilgan.
“Ushbu ogohlantirishni jiddiy qabul qiling. Yaqin soatlarda favqulodda evakuatsiya eʼlon qilinishi mumkin”, — degan Sergey Salmin.
Maʼlumot o‘rnida, 6-aprelga o‘tar kechasi Orskdagi daryo to‘g‘oni yorilishi oqibatida suv sizib chiqishi yuz berdi. Keyinchalik esa toshqin yuz berdi. So‘nggi maʼlumotlarga ko‘ra, Orenburg viloyatida 10 mingdan ortiq uy suv ostida qolgan, 6,5 mingga yaqin fuqaro evakuatsiya qilingan. Mintaqada federal darajadagi favqulodda holat eʼlon qilingan. Suv sathi 10-aprelda eng yuqori darajaga yetishi kutilmoqda.
Izoh (0)