Россиянинг Оренбург шаҳрида 9 апрель куни кечки соат 19:00 га яқин дарё сув сатҳи 9 метрга кўтарилиши ортидан огоҳлантириш сигналлари чалинди. Бу ҳақда “ТАСС” нашри маълум қилди.
Шаҳар мэри Сергей Салмин сув остида қолиши мумкин бўлган ҳудуддан болалар, қариялар, ногиронлар ва уй ҳайвонларини олиб чиқишга чақирган. Фавқулодда ҳолатга тайёргарлик кўришга чақирган.
“Урал дарёсидаги сув сатҳи кескин кўтарилиб, 914 сантиметрлик белгига етди. Агар у 930 сантиметрдан ошса, янги ҳудудларни сув босади. Вазият жуда жиддий, чунки сув тезда кириб келиши мумкин”, — деган шаҳар ҳокими баёнотда.
Шаҳар маъмурияти фавқулодда вазиятлар қутқарув бригадаларини ҳудудга жалб қилган. Тошқин остида қолганлар қутқариб олинаётгани айтилган.
“Ушбу огоҳлантиришни жиддий қабул қилинг. Яқин соатларда фавқулодда эвакуация эълон қилиниши мумкин”, — деган Сергей Салмин.
Маълумот ўрнида, 6 апрелга ўтар кечаси Орскдаги дарё тўғони ёрилиши оқибатида сув сизиб чиқиши юз берди. Кейинчалик эса тошқин юз берди. Сўнгги маълумотларга кўра, Оренбург вилоятида 10 мингдан ортиқ уй сув остида қолган, 6,5 мингга яқин фуқаро эвакуация қилинган. Минтақада федерал даражадаги фавқулодда ҳолат эълон қилинган. Сув сатҳи 10 апрелда энг юқори даражага етиши кутилмоқда.
Изоҳ (0)