Ayrim vazirlik, idora va tashkilotlar tomonidan avtotransport xarid qilishi holatlari jamoatchilik o‘rtasida keng muhokamalarga sabab bo‘lmoqda.
Iqtisodiyot va moliya vazirligi taqdim qilgan ma’lumotlarga ko‘ra, 2023-yilda O‘zbekiston konsolidatsiyalashgan byudjeti daromadlari 321,0 trillion so‘mni, xarajatlari 380,0 trillion so‘mni tashkil etdi. Bunda xarajatlar daromadlardan 59 trillion so‘mga ko‘p bo‘lib, byudjet taqchilligi yalpi ichki mahsulotga nisbatan 5,5 foizga yetgan.
“O‘zbekiston–2030” strategiyasida belgilangan keng ko‘lamli islohotlarni 2024 yilda samarali amalga oshirish, xalqimizning kundalik hayotida ijobiy o‘zgarishlarga erishish maqsadida joriy yilda byudjet mablag‘lari hisobidan barcha sohalarda ko‘plab muhim ijtimoiy-iqtisodiy ahamiyatdagi amaliy vazifalarni bajarish rejalashtirilgan.
Biroq, byudjet taqchilligi fonida joriy yilning 1-chorak yakunlari bo‘yicha ayrim vazirlik va davlat tashkilotlari narxlari yuqori bo‘lgan avtotransport vositalarini harid qilish uchun mablag‘lar sarflayotganligi kuzatilmoqda.
Masalan, Kambag‘allikni qisqartirish va bandlik vazirligi huzuridagi Jamoat ishlari jamg‘armasi tomonidan 444 mln so‘mga bir dona "BYD SONG PLUS" avtotransport vositasini, Energetika bozorini rivojlantirish va tartibga solish agentligi tomonidan 504 mln so‘mga premium-klassdagi "BYD HAN" avtomobilini hamda Oliy Sud tomonidan 1,5 mlrd so‘mga "yo‘ltanlamas" "Toyota Land Cruiser 300" avtomobilini va boshqa ayrim tashkilotlar ham shu kabi avtotransport vositalarini xarid qilishayotgani shular jumlasidandir.
Xorijiy mamlakatlarda vazirliklar rahbarlari o‘zlarining xalq xizmatidagi davlat xodimi ekanligini bildirish, o‘zining xalqqa yaqinligini ko‘rsatish maqsadida qimmatbaxo xizmat avtomobillari o‘rniga jamoat transporti va velosipedlarda ishga kelishni afzal bilishmoqda.
Keng jamoatchilik tomonidan vazirlik va idoralar mablag‘larni sarf qilishda birinchi navbatda hududlardagi, jumladan mahallalardagi ijtimoiy-iqtisodiy muammolarni xal etishga, amalga oshirilayotgan islohotlarni har bir xonadonga yetib borishini ta’minlashga e’tibor qaratishi zarurligi ta’kidlanmoqda.
Yuqoridagilardan kelib chiqqan holda xalq vakili sifatida, byudjetdan mablag‘ oluvchi vazirlik, idora va tashkilotlarni byudjet mablag‘larini sarflashda tejamkorlikka amal qilishlariga, foydalanishdagi avtotransport vositalari mavjud bo‘lgan holda mazkur maqsad uchun xarajatlarga yo‘l qo‘ymaslikka chaqiramiz.
O‘zbekiston Respublikasi Oliy Majlisi Qonunchilik palatasi deputatlari, O‘zLiDeP Fraksiyasi a’zolari Nodir Abduvaliyev va Sardor G‘iyosov
Izoh (0)