O‘zbekistonda yer olgan yoshlarga 100 mln so‘mgacha kredit ajratiladi

O‘zbekistonda prezident qarori bilan yer olgan yoshlarga 100 million so‘mgacha kredit ajratiladi. Bu haqda Adliya vazirligi xabar berdi. 

Qarorga ko‘ra, qishloq xo‘jaligi mahsulotlarini yetishtirishdan sotishgacha bo‘lgan zanjirni qamrab oluvchi yangi tizim bo‘yicha talabgorlarni qo‘llab-quvvatlash choralari joriy etiladi.

Xususan, qarorda nazarda tutilgan shartlarda va mablag‘lar doirasida talabgorlarga tijorat banklari tomonidan 7 yilgacha muddatga 100 million so‘mgacha kredit ajratish. Bunda, qaror doirasida barcha turdagi kreditlarni “mahalla yettiligi”ning kafilligi asosida ajratishga ruxsat beriladi hamda ular kreditlarning natijadorligi uchun teng javobgar bo‘ladi.

Shuningdek, talabgorlarga mini-texnika, urug‘ va ko‘chat xaridiga “Yoshlar daftari” jamg‘armasidan 5 million so‘mdan subsidiya, Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasidan 33 million so‘mgacha kredit ajratiladi.

Joylardagi 167 ta Agromarkazlar orqali xususiy sektorni jalb etgan holda urug‘, ko‘chat yetkazish, mineral o‘g‘it berish, mini-texnika va agronom xizmatlari yo‘lga qo‘yiladi hamda yetishtirilgan mahsulotni xarid qilishga qayta ishlovchilar va eksport qiluvchilar biriktiriladi.