O‘zbekistonda 2024-yil 1-chorak holatiga ko‘ra monitoring jarayonida davlat organlari va tashkilotlarning 19 ta veb-resurslarida 70 ta zaiflik va kamchiliklar aniqlanib, bartaraf etildi. Bu haqda “Kiberxavfsizlik markazi” DUK xabar berdi.
Qayd etilishicha, ushbu vaqt mobaynida internet tarmog‘ining milliy segmentida 3 million 290 mingdan ortiq kiberhujumlar kuzatilgan.
Kibermakonda mavjud zaifliklar va tahdidlar to‘g‘risidagi maʼlumotlarni aniqlash, to‘plash va ularni bartaraf etish bo‘yicha chora ko‘rish maqsadida, markazning monitoring tizimlari orqali davlat organlari va boshqa tashkilotlarning axborot infratuzilmalarida aniqlangan 369 ming 660 dan ortiq kibertahdidlar bo‘yicha maʼlumotlar tegishli tashkilotlarga taqdim etilgan.
O‘z o‘rnida kiberxavfsizlik talablariga rioya etilmagani sababli so‘nggi 3 oy mobaynida UZ domen zonasida joylashgan 45 ta veb-saytda kiberxavfsizlik hodisasi aniqlandi. Shulardan, 12 tasi davlat organlariga qolgan 33 tasi xususiy sektorga tegishlidir, — deyiladi xabarda.
Eslatib o‘tamiz, Oliy Majlis Senati sayti 2022-yil 2-noyabr kuni xakerlar hujumiga uchragan edi. Ushbu holat yuzasidan olib borilgan tergovga qadar tekshiruv vaqtida aniqlanishicha, 2022-yilning sentyabridan boshlab Norin tumani Ulug‘bek ko‘chasida yashovchi, voyaga yetmagan 16 yoshli M.B. boshqalar bilan oldindan o‘zaro jinoiy til biriktirib, bir guruh bo‘lib, internet ijtimoiy tarmog‘i orqali kiberhujum uyushtirishga oid materiallarni ko‘rib, ushbu yo‘nalishda noqonuniy xatti-harakatlarni o‘zlashtirib olib, 2-noyabr kuni Oliy majlis Senatiga tegishli bo‘lgan “www.senat.uz” veb-saytiga hamda boshqa saytlarga noqonuniy kiberhujumlar amalga oshirgandi.
Izoh (0)