Hacked by MSecurity.Pro xakerlar jamoasi O‘zbekiston Ichki ishlar vazirligining “IIV.uz” rasmiy saytiga hujum uyushtirdi.
Idora saytiga yaqin 20 daqiqadan buyon kirib bo‘lmayapti. Asosiy sahifaga xakerlik guruhining logotipi joylashtirilgan va u yerga “Biz bir butunlikda kuchli jamoamiz va hech kimdan qo‘rqmaymiz”, deya izoh yozilgan.
Ichki ishlar vazirligi matbuot kotibi Shohrux G‘iyosov holatga munosabat bildirib, ushbu xabarlar haqiqatga to‘g‘ri kelmasligini ma’lum qildi va vazirlikning hukumat portalidagi sahifasiga tegishli havola (https://gov.uz/iiv/) bilan bo‘lishdi.
E’tiborli jihati, Ichki ishlar vazirligining rasmiy Telegram kanali 4-yanvarga qadar e’lon qilgan xabarlari ostiga aynan hujumga uchragan “IIV.uz” saytiga havola berib kelgan.
Eslatib o‘tamiz, Oliy Majlis Senati sayti 2022-yil 2-noyabr kuni xakerlar hujumiga uchragan edi. Ushbu holat yuzasidan olib borilgan tergovga qadar tekshiruv vaqtida aniqlanishicha, 2022-yilning sentabridan boshlab Norin tumani Ulug‘bek ko‘chasida yashovchi, voyaga yetmagan 16 yoshli M.B. boshqalar bilan oldindan o‘zaro jinoiy til biriktirib, bir guruh bo‘lib, internet ijtimoiy tarmog‘i orqali kiberhujum uyushtirishga oid materiallarni ko‘rish orqali, ushbu yo‘nalishda noqonuniy xatti-harakatlarni o‘zlashtirib olib, 2-noyabr kuni Oliy majlis Senatiga tegishli bo‘lgan “www.senat.uz” veb-saytiga hamda boshqa saytlarga noqonuniy kiberhujumlar amalga oshirgandi.
Izoh (0)