Qirg‘iziston chegarasini noqonuniy kesib o‘tishda gumonlanib, qo‘lga olingan rossiyalik faol Mansur Movlayev o‘z vataniga majburan chiqarib yuborilishi mumkinligidan qo‘rqib, respublikani tark etdi. Bu haqda faolning advokati Baxit Avtandil “Kavkaz.Realii” nashriga ma’lum qildi.
Advokatning qo‘shimcha qilishicha, Movlayevning qayerdaligi hozircha noma’lum, aniqrog‘i, xavfsizlik nuqtayi nazaridan ma’lum qilinmayapti.
“U deport qilinmaslik uchun respublikani tark etgan. Qanday qilib, men bilmayman. Aytishimiz mumkinki, u yolg‘iz o‘zi sud qarorini bajardi va mustaqil ravishda Qirg‘iziston chegarasini tark etdi”, — dedi Avtandil.
Oktyabr oyi boshida Bishkekning Pervomayskiy tuman sudi Movlayevni Qirg‘iziston chegarasini noqonuniy kesib o‘tishda aybdor deb topib, olti oylik koloniyaga yuborish, so‘ngra deportatsiya qilish haqida hukm chiqargandi. Biroq himoyachi faolga nisbatan maksimal jazo tayinlanishi uchun apellyatsiya va petisiya berish niyatida edi, chunki advokatga ko‘ra, mahkum o‘z vatanidan ko‘ra xorijiy davlatda xavfsizroq bo‘ladi.
20-noyabr kuni Bishkek shahar sudi Movlayevni hibsga olish muddati tugagani sabab uni ozod qildi. Faol Qirg‘iziston hududidagi tergov izolyatorida 3 oy o‘tirdi, bu esa koloniyada jazo o‘tashning 6 oyiga teng hisoblanadi — mamlakat qonunchiligiga ko‘ra, izolyatordagi bir kun jazoni o‘tash koloniyasidagi ikki kunga teng.
Shu bilan birga, rossiyalikni Qirg‘izistondan chiqarib yuborish qarori o‘z kuchida qoldi.
28 yoshli Mansur Movlayev Checheniston rahbari Ramzan Qodirovni keskin tanqid qilgani, respublikadagi inson huquqlari buzilishi va siyosiy repressiyalarga qarshi chiqishlari bilan tanilgan. 2020-yilda faol Rossiya Jinoyat kodeksining giyohvand moddalar savdosi uchun javobgarlikni nazarda tutuvchi 228-moddasiga asosan uch yilga ozodlikdan mahrum etilgan. Chechen muxolifatchilariga ko‘ra, ish soxta bo‘lgan. 2022-yilda Movlayev shartli ravishda ozod qilindi, ammo tez orada o‘g‘irlab ketildi va Checheniston politsiya bo‘limlaridan biriga olib ketildi. Ammo u hujjatlarisiz qochib, Qirg‘izistonga yetib olishga muvaffaq bo‘lgan. Rossiya uni federal qidiruvga bergan.
Movlayevning Markaziy Osiyo respublikasida hibsga olingani shu yilning avgust oyi oxirida ma’lum bo‘ldi. Sentyabr oyida faol Qirg‘iziston hukumatiga unga qochqin maqomini berishni so‘rab murojaat qilgan.
Izoh (0)