Xorazmda fermer xo‘jaliklariga ajratilgan 214 mln so‘mlik yonilg‘i-moylash materiallari talon-toroj qilindi

Xorazmda yonilg‘i-moylash materiallarini o‘zlashtirgan operatorlar aniqlandi, deb xabar beradi Bosh prokuratura huzuridagi departament.

Qayd etilishicha, departamentning Xorazm viloyat boshqarmasi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tekshiruvda “U.N.” MCHJga qarashli FYTSH sobiq katta operatorlari A.A. va D.E. fermer xo‘jaliklariga sotish uchun ajratilgan jami 214 million so‘mlik yonilg‘i-moylash materiallarini o‘zlashtirish yo‘li bilan talon-toroj qilganliklari aniqlangan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Xorazm viloyatida 1,4 milliard so‘m kredit mablag‘ini noqonuniy chetga olib chiqqan shaxslar aniqlangani to‘g‘risida xabar berilgandi.