Xorazm viloyatida 1,4 milliard so‘m kredit mablag‘ini noqonuniy chetga olib chiqqan shaxslar aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Xorazm viloyat boshqarmasi tomonidan tergovga qadar tekshiruv o‘tkazilgan. Tekshiruv davomida “A.D.” oilaviy korxonasi masʼul shaxslari davlat kafolati ostida olingan kredit mablag‘lari hisobidan import qilingan parranda boqish uskunalarining narxini sunʼiy ravishda oshirib, aslida bozor bahosi 1,1 milliard so‘m bo‘lgan 25,9 ming parranda boqishga mo‘ljallangan uskunalarni go‘yoki 50 ming bosh parranda boqishga mo‘ljallanganini ko‘rsatgan.
Shu orqali ular hududiy tijorat banki filialidan ajratilgan 2,5 milliard so‘m kreditni “Sh.Y.” xorijiy kompaniyasiga o‘tkazishga erishib, jami 1,4 milliard so‘m kredit mablag‘ini o‘zlashtirish yo‘li bilan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 205-moddasi (hokimiyat yoki mansab vakolatini suiisteʼmol qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi.
Izoh (0)