Joriy yilning 7-fevral kuni FIFA “Bunyodkor” sobiq futbolchilari Rivaldo va Denilson shikoyatlari bo‘yicha qayta ish ochgan bo‘lib, oradan 15 kun o‘tib, klub futbolchilar oldidagi qarzdorlik majburiyatini bajarishi lozimligi to‘g‘risida qaror chiqargandi.
OFK litsenziyalash talabidan kelib chiqib, professional futbol klubi yilning 31-mart sanasiga qadar qarzdorlik bilan bog‘liq masalalarni hal etishi lozim. Olib borilgan muzokaralar natijasida tomonlar 30-mart kuni kelishuvga erishdi. Natijada “Bunyodkor” litsenziyalash platformasiga lozim hujjatlarni yuklashga ulgurdi.
FIFA qaroriga ko‘ra, “Bunyodkor” Rivaldo va Denilson oldidagi qarzdorlikni shu yilning 7-aprel sanasiga qadar bartaraf etishi kerak edi.
“Qaldirg‘ochlar” FIFA nizolarni hal qilish palatasi va CAS qaroriga ko‘ra, Rivaldoga: 2 489 947 yevro – klub tomonidan braziliyalik futbolchiga to‘lanmagan mukofot puli hamda yillik 5 foiz ustama; 5 664 000 yevro – shartnoma bekor qilinishi sababli tovon puli hamda yillik 5 foiz bonus. 10 ming Shveysariya franki – arbitraj sudi jarayonida xarajatlar uchun tovon puli to‘lab berishi kerak edi.
Denilsonga esa 700 000 dollar – klub tomonidan braziliyalik futbolchiga to‘lanmagan mukofot puli hamda yillik 5 foiz ustama; 400 000 dollar – kelishuv shartlari buzilganligi uchun tovon puli hamda yillik 5 foiz bonus. 10 ming Shveysariya franki – arbitraj sudi jarayonida xarajatlar uchun tovon puli to‘lashi belgilangandi.
Yangi kelishuvga ko‘ra to‘lanishi lozim bo‘lgan summalar sezilarli ko‘rinishda kamaytirildi.
Qo‘shimchasiga, kelishilgan summa Denilsonga 2026-yilgacha uch qismga bo‘lib to‘lanadigan bo‘ldi. Rivaldo bilan hisob-kitob esa 2028-yilga qadar har yili bir martadan amalga oshiriladigan bo‘ldi.
Eslatib o‘tamiz, Rivaldo 2008-yildan 2010-yilga qadar “Bunyodkor” sharafini himoya qilgan. Denilson esa 2010-yilda klub safida to‘p surgan.
Izoh (0)