Surxondaryoning Angor tumani hokimi “ayollar daftari” jamg‘armasi hisobidan 349 million 900 ming so‘mga Captiva-5 avtomashinasi xarid qilgandi. Korrupsiyaga qarshi kurashish agentligi bu masala yuzasidan o‘tkazilgan o‘rganish natijalarini e’lon qildi.
Ushbu avtomobil tuman hokimligining 2024-yil 12-fevraldagi qaroriga asosan xarid qilingandi. Mas’ullar Angor tumani hokimi ikki yil davomida xizmat avtomobilisiz yurganini, shu sabab xarid amalga oshirilganini ma’lum qilgandi.
O‘rganish jarayonida Angor tuman hokimligi tomonidan Captiva-5T Rremier Black-Matt avtotransport vositasi hokimlikning zaxira jamg‘armasi mablag‘lari hisobidan xarid qilingani tasdiqlandi. Biroq mazkur avtotransport vositasining qiymati Vazirlar Mahkamasining 2021-yil 29-apreldagi 258-son qarori bilan tasdiqlangan davlat boshqaruvi va mahalliy davlat hokimiyati organlarida xizmat avtotransport vositalarini biriktirish talablariga zid ekani aniqlandi.
Hukumat qaroriga ko‘ra, tuman va shahar hokimlari uchun faqat bitta dona, qiymati ming BHMgacha (yoki 340 million so‘mgacha) bo‘lgan xizmat avtotransport vositasi xarid qilinishi mumkin.
Shunga ko‘ra, agentlik taqdimnomasiga asosan ushbu avtotransport vositasi bugungi kunda tuman balansidan chiqarilib, viloyat hokimligi tasarrufiga o‘tkazilishi taʼminlangan.
Izoh (0)