“G‘azo Falastinning ajralmas qismi” — Falastin prezidenti

Falastin prezidenti Mahmud Abbos G‘azo Falastin davlatining ajralmas qismi ekanligini, uning boshqaruvi albatta G‘arbiy Sohil qo‘l ostiga qaytishini maʼlum qildi. Bu haqda Anadolu nashri arab manbalariga tayanib, xabar berdi.

Xabarda aytilishicha, Falastinning amaldagi rahbari Mahmud Abbos Germaniya tashqi ishlar vaziri Annalena Baerbok bilan uchrashgan. Uchrashuvda tomonlar G‘azo anklavidagi so‘nggi voqealarni muhokama qilishgan.

“Prezident Falastin davlatining G‘azo sektorida yoki G‘arbiy Sohilda, shu jumladan, Sharqiy Quddusda bo‘lsin, har qanday Falastin fuqarosining ko‘chirilishini qatʼiyan rad etishini yana bir bor taʼkidlab, G‘azo Falastin davlatining ajralmas qismi ekanligini bildirib o‘tdi. Isroil hukumatining G‘azo sektorini Falastin yerlarining asosiy qismidan ajratib, o‘ziga qo‘shib olish rejalari noqonuniy ekanligini, G‘azoning bir qarich yerini ham egallab olish mumkin emasligini maʼlum qildi”, — deyiladi Germaniya tomoni tarqatgan xabarda.

Birlashgan Millatlar Tashkiloti Xavfsizlik kengashining G‘azoda sulh bo‘yicha yaqinda qabul qilingan rezolyutsiyasiga to‘xtalar ekan, Mahmud Abbos uni amalga oshirish muhimligini taʼkidlagan. Prezident, shuningdek, xalqaro hamjamiyatni davom etayotgan vahshiy tajovuz natijasida G‘azoga yuz bergan ocharchilikka chek qo‘yish uchun barcha o‘tish joylari orqali sektorga gumanitar va tibbiy yordam yetkazish bo‘yicha saʼy-harakatlarni muvofiqlashtirishga chaqirdi.