Anxel Di Mariya golli uzatmalar bo‘yicha Maradonani ortda qoldirib, ikkinchi o‘ringa ko‘tarildi

Argentina terma jamoasi 23-mart kuni o‘rtoqlik uchrashuvida Salvador terma jamoasini mag‘lub etdi. Uchrashuv 3:0 hisobida yakunlandi.

Yarim himoyachi Anxel Di Mariya uchrashuvda golli uzatmani amalga oshirdi va Argentina terma jamoasi tarixidagi golli uzatmalar soni bo‘yicha ikkinchi o‘rinni egalladi. Hozirda uning hisobida 27 ta uzatma bor va bu borada Diego Maradonadan oldinga o‘tib oldi. 

Bu ko‘rsatkich bo‘yicha Lionel Messi yetakchilik qilmoqda. 36 yoshli argentinalik futbolchining hisobida 54 ta golli uzatma bor.

Di Mariya Argentina terma jamoasida 2008-yilning sentabrida debyut qilgan. Futbolchi terma jamoadagi professional faoliyati davomida 136 ta o‘yin o‘tkazib, 29 ta gol urgan.

Di Mariya terma jamoa bilan birgalikda Amerika kubogi (2020/2021) va Qatarda bo‘lib o‘tgan 2022-yilgi jahon chempionatida g‘olib chiqdi.

Joriy mavsumda 36 yoshli futbolchi “Benfika” safida 39 ta o‘yinda maydonga tushib, 15 ta gol urdi va 11 ta golli uzatmani amalga oshirdi.