Анхел Ди Мария голли узатмалар бўйича Марадонани ортда қолдириб, иккинчи ўринга кўтарилди

Аргентина терма жамоаси 23 март куни ўртоқлик учрашувида Салвадор терма жамоасини мағлуб этди. Учрашув 3:0 ҳисобида якунланди.

Ярим ҳимоячи Анхел Ди Мария учрашувда голли узатмани амалга оширди ва Аргентина терма жамоаси тарихидаги голли узатмалар сони бўйича иккинчи ўринни эгаллади. Ҳозирда унинг ҳисобида 27 та узатма бор ва бу борада Диэго Марадонадан олдинга ўтиб олди. 

Бу кўрсаткич бўйича Лионель Месси етакчилик қилмоқда. 36 ёшли аргентиналик футболчининг ҳисобида 54 та голли узатма бор.

Ди Мария Аргентина терма жамоасида 2008 йилнинг сентябрьида дебют қилган. Футболчи терма жамоадаги профессионал фаолияти давомида 136 та ўйин ўтказиб, 29 та гол урган.

Ди Мария терма жамоа билан биргаликда Америка кубоги (2020/2021) ва Қатарда бўлиб ўтган 2022 йилги жаҳон чемпионатида ғолиб чиқди.

Жорий мавсумда 36 ёшли футболчи “Бенфика” сафида 39 та ўйинда майдонга тушиб, 15 та гол урди ва 11 та голли узатмани амалга оширди.